Nga Boldnews.al
Ben Blushi i ka lënë pas kohët kur, në fjalorin e tij, Edi Rama quhej “Deliri”. Publiku shqiptar i mban mend mirë fjalimet e goditura të Blushit në Parlamentin e kaluar kundër kryetarit të Partisë së tij, pasi e kuptoi që nuk ishte në planet e Ramës për të qenë pushtetar i lartë.
Ben Blushi, një figurë e vjetër e Partisë Socialiste, shpresonte që të merrte rolin e “pasardhësit” të Edi Ramës, kur ky i fundit të largohej nga loja e pushtetit. Por ai mbeti shumë i zhgënjyer, kur Rama e vuri veten në rolin e mentorit të Erion Veliajt.
E, nga ai moment, Ben Blushi nisi revanshin e tij kundër lidershipit të Partisë Socialiste. Një luftë, e cila, gjithësesi ishte e destinuar për t’u humbur nga ish-mbështetësi kryesor i Fatos Nanos që kërkonte të gjente rrugën e pushtetit edhe me Ramën.
Pasi përfundoi mandatin e deputetit, në vitin 2017, Ben Blushi mbeti jashtë listës së Partisë Socialiste. Ai krijoi një partizë, të quajtur ‘LIBRA”, të cilës nuk ia vari asnjë prej drejtuesve kryesorë politikë, të maxhorancës dhe opozitës.
Pasi dështoi me sukses në këtë sipërmarrje politike, Ben Blushi gjeti rrugën për t’u rikthyer në jetën mediatike shqiptare, një aktivitet që e ndërpreu në vitin 1997, kur u largua nga posti i kryeredaktorit të “Koha Jonë”.
Në “erën e re” e re mediatike, Blushi bindi Vjollca Hoxhën për të marrë drejtimin e Top Channel. Puna e tij si drejtor në televizionin kryesor privat nisi me një politikë editoriale grindavece ndaj Edi Ramës.
Editoriale dhe kronika të njëpasnjëshme të Top Channel e shndërruan televizionin në një opozitar të vendosur ndaj qeverisë së “Rilindjes”. Vëmendja e publikut u rikthye tek lajmet e Top Channel, i cili prej shumë kohësh konsiderohej zgjatim i zyrës së propagandës Rama-Fuga.
Por, periudha premtuese opozitare e Blushit, zgjati sa shiu në verë. Ai arriti të përfshinte veten në radarin e Edi Ramës. Ky i fundit, i bezdisur nga kronikat negative të Top Channel, ia gjeti shumë shpejt ilaçin Ben Blushit.
Drejtori i Top Channel u pa shumë shpesh në shoqërinë e Endri Fugës, i cili shërben si paradhoma e medias për të mbërritur tek Edi Rama.
Bisedat intime mes tyre u pasuan me vizitat e Blushit në zyrën e Kryeministrit, nën shoqërinë e biznesmenit të fuqishëm, Zamir Mane.
Tanimë Blushi e kishte gjetur “biletën” për të hyrë në zemrën e Edi Ramës. Nga njëra anë Fuga i butë i Ramës dhe nga ana tjetër Zamir Mane i fuqishëm…i kryeministrit.
Ben Blushi e harroi “opozitarizmin” e tij. Ai tashmë është rikthyer pranë zyrave të pushtetit. Natyrisht, nuk arriti të thyente lidhjen Rama-Veliaj. Por zgjodhi të hynte nga dritarja, me “shkallët” e ofruara nga Fuga dhe Zamiri.
Tashmë, Ben Blushi dhe Top Channel i Vjollca Hoxhës u rikthyen në rrugën e drejtë të ‘Rilindjes”, të cilët e humbën për pak javë.
Blushi shpëtoi nga “paaftësia e tij”, siç e vlerësonte Edi Rama pak vite më parë, dhe ri-sistemoi raportet me pushtetin dhe biznesnin.
Si një “rilindas” i vërtetë, Blushi e sheh veten në “ajkën” e vendit, tek ata që shijojnë pushimet në Kubë e Panama.
Beni “rilindi” vetë!
https://www.youtube.com/watch?v=6sXKAfpDu_s&feature=youtu.be
