Analisti Andi Bushati komentoi pasditen e sotme dosjen 339, ndërsa pak ditë më parë është thirrur në prokurori për të dëshmuar kryebashkiaku i Durrësit, Vangjush Dako.
Në studion e News 24, Bushati u shpreh se kryeprokurorja Arta Marku ka zgjedhur të hetojë kryebashkiakun Dakon pa hapur asnjë dosje.
“Padyshim më mirë që është thirrur në prokurori kryebashkiaku i Durrësit sesa mos të thirrej, siç ka ndodhur muaj më parë. Hierarkia është vendosur për të varrosur disa dosje.
Kemi këtë prokurore të zgjedhur nga votat e socialistëve që ka zgjedhur për të hetuar Dakon dhe nuk ka hapur asnjë dosje.
Dosja Dako-Avdylaj, për vjedhjen dhe grabitjen e votave në Durrës, është pikërisht ajo për të cilën prokurorët u lëvizën. Më shumë se kjo dosje jemi te lënia e saj mënjanë. Gjithmonë duke mos insistuar për të mos hetuar këtë dosje kanë bërë një lëvizje spektakolare. Por, e gjithë dinamike na bën shumë dyshues që nuk ka një vullnet për zbardhjen e kësaj gjëje”, tha ai.
Në vijim ai ka komentuar tërheqjen nga gara të disa prej kandidatëve të Bindjes Demokratike kur na ndajnë më shumë se një muaj nga zgjedhjet e 30 qershorit. Bushati, tha se për një parti të krijuar me shpejtësi dhe para zgjedhjeve, nuk janë çudi surpriza të tilla.
“Natyrisht, që do kemi surpriza të hidhura të këtij lloji. Për kandidatët e Bindjes mund të kemi surprizat të tilla. Se ishin gjëra të bëra në shpejtësi, një parti e krijuar para zgjedhjeve. Një kandidat mund të jetë i futur i paguar në garë dhe po ashtu ka dalë i paguar nga kjo garë.”, tha Bushati.
