Nga Boldnews.al
Të paktën dy kandidatë për kryebashkiakë dhe 21 kandidatë për këshilltarë të Bindjes Demokratike kanë kërkuar tërheqjen nga zgjedhjet e 30 qershorit. Pas kandidatit të Skraparit që u tha se u kërcënua nga qeveria, një tjetër emër jo pak i njohur, Salvador Kaçaj, u tërhoq nga procesi përmes një letre drejtuar KQZ, ku kërkonte çregjistrimin.
Kaçaj shprehej se nuk mund të shërbente në një proces fasadë që i shërbente Edi Ramës. Hemorragjia në radhët e Bindjes vijoi me 21 kandidatë për këshilltarë që në grup u tërhoqën, duke formësuar kështu të pabindurit në radhët e të bindurve. Ajo që tërheq vëmendjen është fakti se kandidatët e tërhequr duket se janë më të qartë politikisht mbi atë që po ndodh në politikën shqiptare, kur opozita reale është jashtë sistemit dhe po tentohet që të emërohet një opozitë e re, me dy degë, njëra në Kuvend, që i shërben fasadës brenda një sallë ku prej muajsh nuk merret asnjë vendim, dhe tjetra në terren, duke u përdorur për të legjitimuar një proces votimesh pa alternativa, kandidatë, garë e programe.
Të parët po luajnë rolin e Bashkimeve Profesionale, të dytët si Fronti Demokratik, që para 30 vitesh u tentuan të përdoreshin si organizata që garantonin pluralizmin. Dhe ndoshta planet e të Bindurve janë lëkundur disi nga të pabindurit, që të kërcënuar ose jo, me apo pa dëshirë, u tërhoqën apo u futën në lista kandidatësh, thjesht për tu përdorur. Sot në atë që për Rilindjen mund të quhet garë e 30 qershorit, kanë mbetur vetëm të bindurit jo ndaj Bindjes, por ndaj Edi Ramës, edhe pse disa prej tyre, mund të jenë kaq të bindur për shkak se morën rolin e të pabindurve në radhët e opozitës. Dikur Fatos Nano e cilësonte LSI si Lëvizjen e Socialistëve të Inatosur, që kishin vetëm një mision, rrëzimin e Nanos dhe më pas se kishin problemin se me kë do të bënin aleancën e radhës. Sot të Bindurit i ngjajnë më shumë Mjaftistëve, që u shndërruan në 99 dhe më pas në Rilindas. Ndaj dhe duket se të pabindurit e Bindjes zgjodhën që sot mos luajnë rolin e Frontit të dikurshëm, dhe nesër të konsiderohen si pjesë e të rilindurve të lindur nga Rilindja e Ramës…
