Partia Demokratike e quajtur të gënjeshtërt deklaratën e kryetarit të Bindjes Demokratike, Astrit Patozi.
Ky i fundit, përmes një postimi në Facebook, reagoi pas akuzave nga ana e Partisë Demokratike, se BD nuk ka të drejtë të regjistrojë kandidatë në zgjedhjet vendore të 30 qershorit pasi nuk mbështetet ligjërisht nga deputetë me mandat të paktën 6-mujor në Kuvend. Patozi u shpreh se përveç Andi Përmetit, partinë e tij e mbështet edhe një emër surprizë, Lefter Koka, i cili vjen nga radhët e Lëvizjes Socialiste për Integrim.
Reagimi
Ndërkohë, PD, në përgjigjen e saj, shprehet se, mbështetja nga një deputet që nuk është deputet i tij, si në rastin e Lefter Kokës, nuk ka vlerë ligjore.
“Asnjë justifikim me deputetë fallco apo të marrë me qera nuk mund ta mbulojnë faktin se aktorët e Edi Ramës, të regjistruar si kandidate me siglën e paligjshme të Bindjes Demokratike, janë gjithashtu të paligjshëm.
Shërbëtori i bindur i Edi Ramës nuk zotëron një mandat deputeti në Kuvend dhe për pasojë duhet të kishte firma mbështetëse të qytetarëve për të regjistruar kandidatë në zgjedhje.
Mbështetja nga një deputet që nuk është deputet i tij, si në rastin e Lefter Kokës, nuk ka vlerë ligjore. Partia “Bindja Demokratike” nuk ka 6 muaj që është krijuar e jo më të zotërojë për të paktën 6 muaj një mandat deputeti në Kuvend.
Me apo pa parti e kandidatë fallco, votime moniste më 30 Qershor nuk ka për të patur!”, deklaron PD.
