Drejtori i përgjithshëm i Partizanit, Olsi Rama, i ftuar në emisionin “Rubrika Sportive në “RTSH”, hodhi dritë mbi të ardhmen e afërt europiane të klubit, si dhe ofertat për disa nga lojtarët e kuq.
Rama ka sqaruar edhe situatën e Jasir Asanit dhe Egzon Belicës që fliten si largime të mundshme në verë me destinacion Turqinë. “I kam dhënë fjalën presidentit Demi për përmirësimin e skuadrës, por kemi problem koeficientin. Pikët e pakta na vendosin në vazon e dobët dhe rivalët do i kemi gjithmonë më të fortë. Për të ecur para si ekip, do të duhet që të mundim edhe skuadra më të forta. Është e lehtë të ndërhysh tani në merkato për të shtuar elemente.
Nga janari kishim disa prurje, fatkeqësisht kishim 3 lojtarë që u dëmtuan menjëherë. Ishin një lloj fatkeqësie për ne, por ishte një bekim i fshehur. Funksionoi Duka, i cili erdhi në gjendje jo të mirë, kishim kohën dhe luksin ta prisnim dhe e keni parë që është lojtar me cilësi, që na dha dorë dhe na ndihmoi. Ka gjithmonë vend për përmirësim. Ofertat? Nëse ka ofertë për Asanin, do ta marrim në konsideratë, por nuk ka asgjë konkrete deri tani. Për Belicën kam lexuar edhe unë, ai është në fundin e kontratës. Belica e di që e ka derën e hapur kurdo te ne për rinovim. Ai është një lojtar i cili ka qenë i jashtëzakonshëm për Partizanin në këtë sezon”, u shpreh mes të tjerash Olsi Rama.
