Kastrioti është skuadra më e rrezikuar për të rënë. E megjithatë, me paraqitjen që kanë bërë që prej janarit e tutje, kanë fituar më shumë se pikët. Dhe shpërblimin kanë filluar ta marrin që tani, teksa klube të ndryshme kanë kthyer vështrimin te lojtarët që po bëjnë diferencën në Krujë.
Një prej tyre është edhe Patrik Bardhi, lojtari i krahut, i cili është vënë në “lupën” e Partizanit. Ky fakt i ngacmon sedrën, por vetëm kaq. Planet i ka të qarta, fillimisht do që të shpëtojë ekipin dhe më pas të mendojë për të ardhmen. Një gjë të tillë e thotë edhe në intervistën e dhënë për “Panorama Sport”, ku veç të tjerave, “skanon” edhe ndeshjen e nesërme me Flamurtarin dhe krejt garën për mbijetesë.
Ka ndikuar barazimi me Laçin në gjendjen psikologjike dhe përgatitjet e kësaj jave?
Kundër Laçit bëmë një paraqitje realisht të mirë, por pësuam një gol në fund dhe u ndëshkuam. Na ka ulur moralin ai 90- minutësh, por jo shpresën. Ka edhe katër javë. Kemi një përballje të fortë përpara me Flamurtarin dhe pastaj kemi një finale kundër Tiranën, ku shpresojmë të bëjmë një ndeshje të madhe.
Përballje e fortë dhe me objektiva të kundërta ju pret në fundjavë. Flamurtari është një kockë e fortë, e kanë treguar edhe në javët e fundit.
Pavarësisht se kanë pasur probleme, të paktën nga sa kam dëgjuar, nuk i kanë reflektuar në fushë. Gjithsesi, sërish kanë treguar se kanë një ekip me cilësi shumë të mira. Ata nuk kanë objektiv si ne, luajnë më lirshëm. Ne duam mbijetesën dhe kjo do ndikojë. Ne do të bëjmë më të mirën që të marrim tri pikët.
Çdo rezultat tjetër, përveç fitores, do të përkthehej rikthim në Kategorinë e Parë?
Kjo është një ndeshje ku duhet të dalim mbi veten, të japim më shumë se maksimumin që të marrim tri pikët. Na duhen me çdo kusht tri pikët, janë të domosdoshme. Është një duel për “jetë a vdekje” që duhet ta fitojmë me patjetër.
Mbijetesa është vështirësuar më shumë se kurrë, sa janë shanset për qëndrim?
Realisht është shumë e vështirë, por ende asgjë nuk ka mbaruar. Ne kemi ndeshjet tona, rivalët të tyret. Ne do japim maksimumin tonë, të tjerat i di Zoti.
Kanë filluar interesimet për kartonin e Bardhit, mes tyre edhe Partizani. Si ndiheni?
Jam shumë i lumtur që ka kërkesa. Gjithsesi, e kam mendjen te Kastrioti, pasi ende nuk ka përfunduar sezoni dhe ende nuk kemi shpëtuar. Do bëj sa më mirë këtu edhe në ndeshjet e mbetura dhe më pas do të shohim për të ardhmen.
/ PANORAMASPORT.AL /
