Tomori do të provojë edhe një herë shansin për të mos rënë automatikisht në Kategorinë e Dytë. Çdo ndeshje që kalon, e bën edhe më të vështirë situatën për beratasit, të cilët tanimë me çdo rezultat tjetër veç fitores do ta shihnin veten një kategori më poshtë.
Kur kanë mbetur edhe dy ndeshje nga finalizimi i kampionatit, Tomori kërkon të marrë maksimumin e pikëve, që minimalisht do t’i jepte shansin për të luajtur një ndeshje shtesë, me shpresën e vetme për të vijuar aventurën në këtë kategori.
Stafi drejtues i Tomorit po bën gjithçka për të marrë më të mirën e këtij takimi, teksa vetëm një ditë përpara ndeshjes me Turbinën, futbollistët kanë marrë edhe pagat e muajit prill. Sakaq, nga informacionet që disponon “Panorama Sport”, në dispozicion të tifozëve pritet të vendosen 2 autobusë, në mënyrë që mbështetja ndaj skuadrës të mos mungojë.
AMINISTIA
Beratasit kanë mbyllur dje në orën 11:30 përgatitjet për takimin që do të luajnë sot në Cërrik ndaj Turbinës. I vetmi që mungon në këtë përballje është futbollisti Denis Dyca, i cili tashmë rezulton me 4 kartonë të verdhë. Mirëpo, për skuadrën beratase ka ardhur edhe një lajm shumë i mirë nga Federata Shqiptare e Futbollit.
Institucioni i futbollit ka vendosur që të falë trajnerin Santiliano Dule për këtë sfidë dhe mund ta drejtojë ekipin nga pankina. Tekniku beratas u dënua me tetë ndeshje pezullim pas incidenteve që ndodhën në sfidën e fazës së dytë me Apoloninë, ku Tomori u dënua me humbjen 3-0 në tavolinë. Tashmë që kanë kaluar shtatë takime dhe ka mbetur vetëm një, federata vendos ta falë trajnerin, duke i dhënë mundësinë që të jetë në drejtim të skuadrës në një ndeshje që vendos fatet e sezonit.
Në këtë mënyrë, Dule do të ketë mundësinë t’i karikojë më mirë futbollistët e tij. Lojtarët kanë marrë ngarkesat maksimale gjatë të gjithë javës dhe janë plotësisht gati për transfertën e sotme. Një ndeshje që mund të vendosë përfundimisht fatet e sezonit për beratasit që rrezikojnë shumë rënien në Kategorinë e Dytë.
/ PANORAMASPORT.AL /
