5 parcela me rreth 7150 rrënjë bimë narkotike janë asgjësuar nga policia në Vlorë, ndërkohë që janë arrestuar dy kultivuesit.
Sipas burimeve nga policia në pranga kanë rënë shtetasit Caush Hoxha, 55 vjeç, banues në fshatin Llakatund dhe Sulo Haxhiraj, 44 vjeç, banues në fshatin Kërkovë.
Dy personat janë kapur në afërsi të territorit ku u gjetën të kultivuara 7 mijë bimët.
Bimët narkotike ishin të mbjella në të dy anët e përroit pranë fshatit Drithash – Komuna Shushicë, ku lartësia e tyre varionte nga 10 cm deri në 60 cm, të cilave iu bë asgjësimi i tyre me anë të djegies.
Gjithashtu, gjatë kontrollit të ushtruar kundër kultivimit të bimëve narkotike, në fshatin Radhimë, pranë vendit të quajtur “Përroi i Katerisë” janë gjetur të mbjella edhe 150 rrënjë bimë narkotike të tjera, të cilat u asgjësuan me djegie. Po punohet për identifikimin dhe kapjen e kultivuesve të tjerë.
