Emërimi i Arta Markut si Prokurore e Përgjithshme e Përkohshme, solli mjaft diskutime dhe debate të ashpra brenda politikës shqiptare.
Opozita në atë kohë deklaronte se Marku është një ‘ushtare’ e bindur e deputetit Ulsi Manja, i cili e vuri në krye të organit të akuzës me qëllim mbulimin e dosjeve ku ishin të përfshirë zyrtarë mjaftë të rëndësishme të Rilindjes.
Ndërkohë lidhur me emërimin e saj si PPP, ka folur mbrëmjen e sotme vetë Arta marku, në emisionin ‘Open’.
Marku tha se ajo u emërua si PPP pasi ishte një prokurore me eksperiencë të gjatë dhe me magjistraturë.
“Në një nga ligjet, pjesë e paketës së reformës në drejtësi, në ligjin për funksionimin dhe organizmin e prokurorisë, në një dispozitë kalimtare të këtij ligji parashikohej se nëse Këshilli i lartë i prokurorisë nuk do zgjidhej në kohë dhe gjatë kësaj periudhe mbaronte mandati i prokurorit që ishte në detyrë aso kohe, funksionet e prokurorit të përgjithshëm do t’i ngarkoheshin për t’i kryer një nga prokurorët me më shumë eksperiencë, që kishte përfunduar magjistraturën apo që kishte një gradë shkencore në drejtësi, që kishte një eksperiencë pune mbi 15 vjet në sistemin e prokurorisë dhe do caktohej me vendim të kuvendit për t’i ushtruar detyrat e prokurorit të përgjithshëm në mënyrë të përkohshme”, tha ajo.
Gjithashtu ajo tha se në këtë mënyrë u shmang ngërçi ligjor që mund të krijohej nëse KLP do vononte të ngrihej.
