Nga Boldnews.al
Roland Ilia, ish-pedagogu dhe avokati shkodran që u zgjodh një prej Komisionerëve të Vetingut në verën e vitit 2017, rezulton të jetë pa shtëpi dhe i mbytur në borxhe.
Ilia, ish-kandidat për deputet në zgjedhjet e përgjithshme të vitit 2009 nga lista “G-99” e Erion Veliajt, duket se nuk ka pasur fat në pasuri.
Disa të dhëna të siguruara në mënyrë ekskluzive nga “Boldnews.al” dëshmojnë se në emër të Roland Ilias nuk rezulton të jetë regjistruar shtëpi banimi. Është e paqartë se ku jeton komisioneri dhe familja e tij, pasi nuk rezulton të jetë qiramarrës. Me shumë mundësi, ai mund të jetojë në shtëpinë e familjarëve të tij.
Ndërkohë, po nga të dhëna të besueshme, rezulton se Roland Ilia ka edhe kredi për të shlyer, në vlerën e rreth 15 milionë lekëve (të vjetra).
Në bazë të të dhënave zyrtare, Roland Ilia është regjistruar si person fizik “Zyrë avokatie” në Shkodër, në muajin Nëntor 2014.
Në atë kohë, si edhe deri në vitin 2017, ai ka qenë njëkohësisht edhe pedagog i brendshëm në universitetin e qytetit të tij.
Dy-punësimi i tij, si pedagog i brendshëm në Universitetin “Luigj Gurakuqi” dhe si avokat, siç duket nuk i kanë krijuar kushtet e nevojshme për t’u bërë pronar i një shtëpie të tijën.
Referuar të dhënave të publikuara deri më tani nga “Boldnews.al” duket se komisioneri Roland Ilia është ndër më të varfërit në institucionin e Vetingut. Kjo, të paktën, duke u krahasuar me drejtuesen e Komisionit të Pavarur të Kualifikimit, Genta Bungo (Tafaj), e cila rezulton të ketë një llogari bankare në vlerën e 100 milionë lekëve (të vjetra).
Gjithashtu, Roland Ilia duket se nuk ka pasur fatin e koleges tjetër, Valbona Sanxhaktari, e cila rezulton të ketë arkëtuar 17 mijë euro nga shitja e një objekti, të ndërtuar në mënyrë të paligjshme.
Gjithësesi, ditë të mira duket se erdhën edhe për Roland Ilian. Ai tashmë është Komisioner i Vetingut dhe paga e tij e lartë do e ndihmojë, të paktën, për të shlyer borxhet. Po ashtu, duke qenë se ushtron funksionet në Tiranë, ndoshta mund të jetë përfitues i një banese sociale, të ofruara nga Bashkia e Erion Veliajt, shefit të tij të dikurshëm në “G-99”.
