“Sheikja” e Komisionit të Vetingut, 100 milionë në llogari bankare

Nga Boldnews.al

Gjatë procesit të Vetingut, publiku është njohur me llogaritë bankare të gjyqtarëve e prokurorëve, disa prej të cilave në shuma aq të mëdha, sa, në leksikun e përditshëm, janë konsideruar si “sheikët” e sistemit të drejtësisë.

Por, disa të dhënave të siguruara në mënyrë ekskluzive nga “Boldnews.al” referojnë se të ashtuquajturit “sheikë” gjenden edhe në radhët e vetë komisionerëve të Vetingut.

Kryetarja e Komisionit të Vetingut, Genta Bungo (Tafaj) rezulton se ka një llogari bankare në vlerën 100 milionë lekë (të vjetra) në një prej bankave të nivelit të dytë.

Në disa dokumenta konfidencialë, të parë nga “Boldnews.al”, rezulton se kryetarja e Komisionit të Vetingut dhe bashkëshorti i saj (i ndjerë) kanë hapur një llogari bankare në vlerën e 10 milionë lekëvë të reja.

Në dokumentat e llogarisë bankare, Genta Bungo (Tafaj) ka deklaruar se kjo shumë është krijuar nga të ardhurat e dy bashkëshortëve ndër vite.

Nga dokumentat zyrtare, rezulton se Genta Bungo (Tafaj), në vitin 2013, ka krijuar një zyrë përmbarimore, së bashku me një person tjetër, në cilësinë e ortakut me 50% të kapitalit.

Genta Bungo ka qenë për një periudhë kohe edhe administratore e zyrës përmbarimore. Në korrik 2017, pra 4 vjet pas krijimit të Zyrës Përmbarimore, ajo jep dorëheqjen si administratore dhe shet kuotat e kapitalit, pasi u zgjodh nga Parlamenti i Shqipërisë në postin e komisioneres pranë Komisionit të Pavarur të Kualifikimit.

LEXO EDHE   “Lindin fëmijë, grupi terrorist ISIS s’i lë të”/ Tmerri që përjetojnë vajzat shqiptare në Siri

Ndërsa bashkëshorti i saj, i cili u nda nga jeta në mënyrë të parakohshme në nëntor 2018, ka qenë specialist në Drejtorinë e Transportit Rrugor. Paga e tij, për shkak të pozicionit, ka qenë në mesataren e rrogave shtetërore.

Pra, duket qartë që llogaria 100 milionëshe e Genta Bungo (Tafaj) është krijuar kryesisht nga të ardhurat e saj, si Përmbaruese Gjyqësore.

“Boldnews.al” nuk ka arritur të sigurojë deklaratën e pasurisë së kryetares së Komisionit të Vetingut. Pas një kërkese zyrtare, drejtuar disa muaj më parë Inspektoratit të Lartë të Deklarimit e Kontrollit të Pasurive dhe Konfliktit të Interesave (ILDKPKI), ky institucion u përgjigj se nuk mund të bënte publike në atë moment deklaratat.

Si argument për shtyrjen e publikimit të deklaratave, ILDKPKI dha faktin që institucioni ishte duke azhornuar sistemin e brendshëm elektronik.

Transparenca e pasurive, sidomos të komisionerëve të Vetingut, ishte një prej kushteve thelbësore për t’i dëshmuar opinionit publik se procesi i rivlerësimit për gjyqtarët dhe prokurorët do të realizohej nga persona me aftësi të larta profesionale e integritet personal.

Por, deri më tani, opinioni publik nuk ka arritur të njihet me pasuritë e komisionerëve të Vetingut.