Ish-Ministri i Jashtëm Paskal Milo ka folur në studion e emisionit “Opinion” për marrëdhëniet mes liderëve të Kosovës dhe të Shqipërisë përgjatë viteve.
Milo tha se historikisht janë krijuar “dyshe” mes politikanëve të dy anëve të kufirit, duke shtuar se aktualisht ka një aleancë mes Ramës dhe Thaçit nga njëra anë, dhe presidentit Ilir Meta dhe Ramush Haradinajt nga ana tjetër.
“Kur vinte këtu Ibrahim Rugova me udhëheqësit e LDK-së, takonin udhëheqësit e PD-së, Berishën, dhe nuk takonin liderët e PS-së. Unë kam qenë në opozitë atë kohë. Pas vitit 1996 dhe vitit 1997, kaloi në invers.
Të preferuarit e Tiranës ishin udhëheqësit e UÇK-së, Rugova mbeti në hije, megjithë ftesat që i bënte kryeministri i Shqipërisë dhe Presidenti, ai nuk vinte në Tiranë.
Pasi u çlirua Kosova u tulatën mosmarrëveshjet, pati disa vjet që u ekuilibruan, por u ngritën pikërisht këto “dyshet” e politikanëve. Në vitet e fundit mes politikanëve nga të dy anët, janë krijuar diferenca të mëdha.
Dyshja Rama-Thaçi dhe dyshja Meta-Haradinaj. Kjo është nga informacionet që kam. Mund të them se Rama dhe Haradinaj përfaqësojnë dy kultura dhe dy qasje të ndryshme, në politika dhe bashkëpunimin Kosovë-Shqipëri.
Rama kërkon të marrë përsipër gjëra të mëdha, por Haradinaj është më praktik, më konkret, bën politikë më lokale”, ka thënë Paskal Milo. /Opinion.al
