Veteranë dhe nostalgjikë të diktaturës dhe figurës së diktatorit Enver Hoxha janë shfaqur sot në varrezat e dëshmorëve, në kuadër të 5 majit, ditës së të rënëve të Luftës Anti-Fashiste.
Me portretet e diktatorit dhe pankarta që i thurnin lavde diktaturës , ata kanë qëndruar për disa minuta përpara monumentit ‘Nënë Shqipëri’.
Kjo nuk është hera e parë kur grupe të caktuara shfaqen me portretet e diktatorit, në një kohë kur Shqipëria është i vetmi vend i ish-bllokut komunist, që ende nuk ka nisur procesin e dekomunistizimit.
Prej ditësh në public ka një debat mes Agron Tufës që drejton institutin kundër krimeve të komunizmit dhe disa prej përfaqësuesve të mazhorancës së majtë, apo pasardhësve të atyre që akuzohen se kanë kryer krime gjatë luftës apo në vitet e diktaturës.
E ndërkohë që ka pasur reagime duke i bërë thirrje Kuvendit që të verifikojë veprimtarinë e institutit, nga drejtues të mazhorancës, përfshi këtu edhe kryeministrin Edi Rama, kurrë nuk ka pasur reagime kundër shfaqjes së portreve të diktatorit Hoxha.