Banorët e përmbytur 5 vite më parë në Shkodër si dhe ata që preken nga ndërtimi i stadiumit të ri kanë protestuar sot para Bashkisë së Shkodrës, ndërkohë që kryeministri Edi Rama zhvillonte një takim me kryebashkiaken Voltana Ademi.
Ata kanë tentuar të takojnë Ramën por janë shtyrë e larguar nga punonjësit e Gardës. Ndërkohë që pas takimit, Rama është detyruar të flasë për ta, për shkak se i kishin zënë rrugën dhe nuk e lejonin të ikte.
Rama tha se do të zbatohet kërkesa e UEFA-s, që ka kërkuar hapësirë më të madhe para tribunës në stadiumin e ri dhe se banorët do të dëmshpërblehen.
Të pakënaqur nga deklarata e tij, banorët kanë kërkuar sërish zgjidhje dhe e kanë penguar të futet në makinë por nuk janë lejuar nga policia, e cila ka shoqëruar në komisariat 2 prej tyre. Mësohet se ata janë lënë të lirë pas disa minutave.
(Boldnews)
