Vërejtja që mund të bëhet ndaj opozitës është që nuk është aq sa duhet agresive.
Kështu u shpreh kreu demokrat Lulzim Basha, gjatë bashkëbisedimit me të pranishmit në tryezën ku opozita e bashkuar paraqitën platformën për zgjedhje të lira dhe të ndershme, si dhe detyrat e qeverisë tranzitore.
Basha tha se është e vërtetë që opozita nuk është aq agresive sa duhet, dhe kjo trimëron krimin dhe qeverinë.
“S’jemi mjaftueshëm agresivë me një qeveri ilegjitime, e kapur në blerje votash”, tha Basha.
Sipas kreut të PD-së, dosja 339 tregon qartazi kapjen e qeverisë dhe kryeministrit në dhunimin e zgjedhjeve duke përdorur banda kriminale.
Basha theksoi se ndodhemi në kushtet e një kolapsi shoqëror, ku qeveria ka humbur përgjegjësinë ndaj qytetarëve.
Kreu demokrat theksoi se në 30 qershor nuk do të ketë zgjedhje, duke shtuar se mund të ketë vetëm votime.
