Orges Shehi u duk mjaft i kënaqur me suksesin e skuadrës së tij ndaj Flamurtarin në “Gol pas Goli”.
Vendosja e skuadrës: E kam thënë që mund të ndryshonim individë dhe vendosje. Sot e vendosa ta filloja me forca të shumta përpara. Shkoi mirë, jam i kënaqur. Me vjen mirë për fitoren.
Zona europiane: Ky kampionat kështu është. Të 9 ekipet janë të gjitha me objektiva. Ka përplasje dhe mund të dalin rezultate të papritura. Kjo fitore na duhej shumë për të ecur përpara.
Loja cilësore: Më vjen mirë që skuadra po i jep kënaqësi publikut. Kanë qenë të pakënaqur nga rezultatet. Ky vit ka qenë i vështirë dhe është akoma. Sot u shfaq ai Skënderbeu dominues. Duhet të ruajmë këtë dëshirë dhe uri. Këto javë duhet të japim 200% për t’u ngjitur aty ku dëshirojmë.
Krasniqi dhe Otto John: Është një dyshe që ka funksionuar. Në shumë pak raste i kemi përdorur të dy. Kemi menduar që të luajmë ndryshe, kemi shumë lojtarë që luajnë në krah. Sot funksionoi, do ta provojmë prapë. Shpresoj të funksionojë. Ndaj Tiranës na mungojnë Radas dhe Dita me kartonë. Duhet të ndryshojmë formacionin. Kaba Samboun e aktivizova në minutat e fundit për t’i treguar që besojmë tek ai, pavarësisht gabimeve që bëri në sfidën e kaluar.
