Dy persona janë arrestuar dhe dy të tjerë janë shpallur në kërkim lidhur me vrasjen e vëllezërve Bilali në Shkodër, më 30 mars, ndërsa dy të tjerë janë shpallur në kërkim.
Mislim Rama dhe Arsen Stojku janë vënë në pranga për vrasjen e Astrit dhe Brahim Bilalit, xhaxhai dhe babi i Asmer Bilalit. Ky i fundit ndodhet pas hekurave (nën masën e sigurisë ‘arrest me burg’) si anëtar i grupit Bajri.
Arrestimet
Burime policore bënë me dije se, Rama 23 vjeç dhe Stojku 29 vjeç, të dy lindur dhe banues në fshatin Mjedë, bashkia Vau i Dejës, akuzohen për veprën penale “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”. Policia njoftoi se bëri ndaj të rinjve ekzekutimi e urdhrave të ndalimit, të lëshuara nga Prokuroria pranë Gjykatës së Shkallës së Parë Shkodër më 25 Prill.
Në kërkim
“U bë shpallja në kërkim e shtetasit Ibrahim Lici, 26 vjeç, si i dyshuari kryesor për veprën penale të vrasjes, si dhe e shtetasit D. B., 29 vjeç, për veprën penale të ‘Përkrahja të autorit të krimit’. Vijon operacioni për gjetjen dhe kapjen e tyre”, njoftoi Policia.
Hetimet
Të njëjtat burime shtuan se: “Pas hetimeve intensive të kryera në drejtimin e Prokurorisë Pranë Gjykatës së Shkallës së Parë Shkodër, rezulton se shtetasit e lartpërmendur kanë planifikuar, organizuar dhe kryer në bashkëpunim këtë vrasje.
Si rezultat i punës së vazhdueshme intensive me metodat speciale të hetimit, nga grupi i posaçëm hetimor, u bë sigurimi i provave materiale dhe shkencore, të cilat çuan në dokumentimin ligjor të kësaj ngjarjeje.
Gjatë veprimeve hetimore u bë sekuestrimi i një automjeti, tre aparateve telefonike celulare, të cilët janë përdorur nga autorët gjatë kryerjes së veprimeve të tyre.
Vazhdon puna për hedhjen dritë mbi motivin e kësaj ngjarjeje dhe identifikimin e personave të tjerë të përfshirë”. /BN/
