Drejtori i Përgjithshëm i Burgjeve, Agim Ismaili, dhe ai i Policisë së Burgjeve, Bardhyl Kacorri, janë përplasur mes tyre lidhur me mënyrën e trajtimit të të burgosurve, veçanërisht atyre që konsiderohen VIP.
Gjatë ditës së sotme u publikuan email-et që dy drejtuesit kryesorë të sistemit penitenciar kanë shkëmbyer mes tyre, ku nuk kanë munguar kërcënimet dhe paralajmërimet.
Ndoshta ky është një prej skandaleve më të forta që ka përfshirë sistemin e burgjeve në Shqipëri dhe ku drejtuesit kryesorë ngrenë dyshime ndaj njëri-tjetrit për takime me të burgosur VIP që nuk shënohen në regjistra, apo për favoret që mund të jenë siguruar për shkak të influencave.
Lidhur me këtë skandal, ka reaguar përmes një postimi në rrjet, deputeti Lefter Maliqi, i cili deri pak kohë më parë ka mbajtur detyrën e zv.Drejtorit të Përgjithshëm të Burgjeve.
Maliqi pak ditë më parë kërkoi një interpelancë me ministren e Drejtësisë, Etilda Gjonaj, pikërisht lidhur me situatën në burgje, dhe ndoshta ato çka mund të deklarojë deputeti mund të jenë shumë herë më të forta sesa ajo çka është botuar sot në media.
“Siguria në burgje drejt degradimit, konflikti i fundit i cili ka kohë që zien midis drejtorit të suksesshëm profesor Kacorrit dhe Drejtorit të Përgjithshëm Ismaili tregon qartë dy anë të kundërta të drejtimit.
Për këto dhe shumë të tjera më të renda , kam që me datë 15 Prill që kam kërkuar interpelancë urgjente me Ministren e Drejtësisë.
Qeveria të reagojë sa s’është vonë. Ju siguroj që kjo Interpelancë me ministren e Drejtësisë do ketë interes të madh public”, shkruan deputeti Maliqi.
