Fitorja me Tiranën i ka dhënë frymëmarrje Kukësit, por jo qetësi. Pikërisht nesër duhet të përballen me Skënderbeun për llogari të gjysmëfinaleve të Kupës së Shqipërisë dhe synimi është i qartë: të sigurojnë kualifikimin që në ndeshjen e parë. E lehtë nuk do të jetë dhe sidomos kur sheh bilancin e mungesave. Verilindorët janë të “sakatuar”. Ernest Gjoka duhet të bëjë llogaritë me 6 mungesa të konfirmuara kundër korçarëve.
MUNGESAT
I kuqi që Uilliam Kordeiro Melo mori ndaj Teutës e detyron që të mos jetë në fushë në këtë 90-minutësh. Mandej, për shkaqe dëmtimesh, është i padisponueshëm Edis Maliqi, i cili sipas informacioneve të para thuhet se ka pësuar një krisje në kavilje. Mbrojtësit të djathtë do i duhen rreth 1 muaj të rikuperohet, çka do të thotë se rrezikon mbylljen e parakohshme të sezonit. Gjithsesi, lojtari do të bëjë radiografi dhe ekzaminime të tjera, për të marrë një përgjigje më të saktë për dëmtimin. Kjo është një humbje e madhe për mbrojtjen e Kukësit, e cila është “çmontuar” seriozisht për shkak të dëmtimeve. Edhe Ylli Shameti nuk ia del për Skënderbeun.
Dëshira e kapitenit për t’u kthyer në fushë ka bërë që të lëndohet sërish. Sipas mjekëve, do i duhen dhe minimalisht 10 ditë kohë për të qenë gati. Gëzim Krasniqi është lojtari tjetër që ka humbur sezonin dhe i mungon mbrojtjes. Ndërsa probleme ka dhe për Valdet Ramën, i cili ka tërheqje të ligamentit kolateral medial. Sulmuesi ndien dhimbje dhe aktualisht nuk del dot në fushë të luajë.
Akoma nuk ka një përcaktim të saktë për shkallën e dëmtimit, por nga sa thuhet paraprakisht rrezikon që të mbetet 3-4 javë jashtë. Pa harruar Irakli Dzarian, i cili prej dy javësh ishte me regjim shtrati, për shkak të një ftohjeje të thellë që kishte marrë. Nuk dihet akoma nëse gjeorgjiani do luajë apo jo, por të paktën dje ka nisur të stërvitet i diferencuar nga grupi.
RRESHTIMI
Duke bërë llogaritë me mungesat, stafi teknik po mundohet t’u marrë më të mirën futbollistëve që ka në dispozicion. Trajnerit do i duhet të “arnojë” formacionin. Por, edhe pse në vështirësi, Gjoka është i bindur që do t’ia dalë ndaj korçarëve. Ai i beson ekipit, ndonëse me shumë mungesa, ndërsa sipas të gjitha gjasave në fushë mund të hedhë këtë formacion:
Frashëri në portë; Çyrbja dhe Rrumbullaku në krahët e mbrojtjes dhe në qendër Cuculi me Teqjen; mesfusha do të përbëhet nga Rroca në të djathtë, Musolli e Limaj në qendër, Ethemi në të majtë; sulmi do mbulohet nga Shkurtaj e Rexhinaldo. Gjithsesi, vendimi final do të merret nesër, pasi pritet që 48- vjeçari të provojë disa skema, duke u bazuar edhe te loja e Skënderbeut.
/Panorama Sport/
