Artur Roshi, kreu i Partisë Balli Kombëtar Demokrat, ka marrë mandatin e deputetit, pasi emri i tij renditej në listat shumëemërore të Partisë Demokratike.
Roshi në një sqarim të tij mbi vendimin për marrjen e mandatit ndër të tjera shprehet “unë vetë kam sakrifikuar për PD, kujtoj “çështjen e të ndjerit Hakile Rama”,dhe kam marrë prej saj shijen bajate të mosmirënjohjes. PD që prej dy vjetësh ka organizuar tryeza të koalicionit Opozitar vetëm me partitë parlamentare duke shpërfillur ne jo-parlamentarët besnikë”.
Kreu i BKD, një parti e krijuar për shkak të ndarjeve që pësoi Balli Kombëtar, ka mbajtur postin e Drejtorit të Institutit të Ndërtimeve gjatë qeverisë Berisha. Roshi, megjithëse i patestuar ndonjëherë mbi numrin e votave që ka si subjekt më vete, për shkak edhe të “zemërgjerësisë” së treguar nga demokratët në qeverisjen e tyre arriti të marrë drejtimin e Institutit, i cili duhej të ishte oponenti kryesor në të gjitha rastet e ndërtimeve monstruoze që pushtuan Tiranën me firmën e kryebashkiakut, sot Kryeministër Edi Rama.
Ai sot flet për parime, por çfarë ka bërë Instituti i drejtuar prej tij me projektet që janë ndërmarrë ndër vite. Vetëm në dy raste Instituti i drejtuar nga Roshi ka ngritur zërin, në rastin e mbikalimit te Zogu i Zi dhe në rastin e Sheshit Skënderbej. Ndërkohë që ka heshtur për dhjetra e dhjetra projekte të tjera, që kanë tkurrur hapësirat publike dhe lulishtet e dikurshme janë kthyer në kulla shumëkatëshe.
Dhe nëse dikush do t’a kujtonte kohën kur drejtonte Institutin, do të sillte në vëmendje një person me kostum dhe të kollarisur që çdo ditë hante nga një pulë, çuditërisht pothuajse gjithmonë, me ata që sot i cilëson si komunistë.
Gjithsesi Roshit përgjatë kohës që PD ishte në pushtet iu respektua një marrëveshje politike, si pjesë e koalicionit opozitar, jo më shumë për peshën elektorale që sot flet se i takon mandati, por për shkak të lojrave politike.
Në sqarimin e tij, mbi marrjen e mandatit të deputetit, Roshi nuk nguron të shprehë kritika për vendimin e marrë për djegien e mandateve, që sipas tij u morr pa pyetur aleatët.
“Nuk ka sens logjika se Opozita jashtë Parlamentit do ta rrëzojë Ramën,ndërsa Opozita në Parlament bashkpunon me Ramën.
Opozitat janë Opozita pavarësisht rrugëve të ndjekura dhe fuqisë së tyre. Dje ishte në Parlament Opozita që është sot jashtë.
Kush e cakton statusin e Opozitarit ,-PD-ja ? Opozita nuk është tapi e më të fortit.
Në gjithë këto vite, PD është një Parti Opozitare parciale e Partisë Socialiste thjesht për pushtetin dhe jo opozitare e filozofisë së majtë mbi të cilën qeveris ajo”, shkruan Roshi ndër të tjera, duke shtuar se do të mbetet derëhapur për bashkëpunimin me PD.
Në fakt e gjithë ajo çka Roshi sqaron është fakti se më shumë e ka marrë mandatin për shkak të inateve me kreun e opozitës, Lulzim Basha, sesa për faktin se atij i takonte ky mandat.
Roshi, i përket një klase politikanësh, që edhe pa pasur elektorat, arriti të mbijetojë si forcë politike, herë duke u përfaqësuar me këshilltarë lokalë në këshillat bashkiake, apo edhe në Kuvend, për shkak të lojrave politike dhe zemërgjerësisë së treguar nga partitë e mëdha në raport me ato që quhen tradicionalë.
Nuk është e vështirë që kjo të verifikohet edhe përmes numrit të votave që kjo parti ka, referuar buletineve të KQZ-së. Gjithsesi sot Roshi, në cilësinë e kryetarit të PBKD-së, do të përfaqësojë këtë subjekt në Parlament, gjë që as në ëndrrën e tij më të bukur, nuk e ka parë.
