I vetëm, dhe me celularin e tij në dorë, avokati Altin Goxhaj nuk është lejuar që të protestojë sot përpara ambasadës së Holandës në Tiranë.
Pavarësisht se prej ditësh kishte kërkuar leje për këtë protestë, ajo është refuzuar në mënyrë të çuditshme nga ana e policisë, dhe sipas Goxhajt do të realizohet pas katër ditësh.
E megjithatë për Fax News Goxhaj ka treguar dhe arsyen e kësaj proteste, pas vendimit që mori parlamenti i Holandës, që votoi pro pezullimit të vizave për shqiptarët. Sipas avokatit të njohur, protesta e tij kishte si qëllim që të tregonte se pezullimi i vizave duhet t’iu bëhet politikanëve shqiptarë dhe jo qytetarëve të vendit tonë.
Po nuk mbaron me kaq! Goxhaj ka bërë përgjegjëse në mënyrë direkte ambasadën e Holandës në vendin tonë, që ka dhënë shuma marramendëse parash për promovimin e politikanëve si Erion Veliaj, apo Edi Rama që frymëzojnë krimin në vend.
“Këta janë ushtria e Gjeneral Leshit, e kanë kthyer policinë e Lleshit. Nuk mund të ndëshkohen shqiptarët për fajet e qeverisë shqiptare, dhe asaj hollandeze, që vetë ka sponsorizuar futjen e Mjaftit dhe Sorosit në qeveri.
Ata ndërhynë në media, krijuan censurë të plotë, dhe krijuan këtë qeveri që kemi. Holanda është vendi i fundit në botë që duhet të ankohet për shqiptarët. Gjysma e të vërtetës është thënë, që krimi shqiptar po bën namin, po harrojnë të thonë se kush e solli krimin në pushtet. I kanë bërë shqiptarët të paaftë, pikërisht me paratë e ambasadës holandeze, ku janë mediat, pse nuk vijnë të tjerët?
Ka bllokuar policia rrugën vetëm se këtu është një person, që jam unë, me kameran e tij. E kemi me kontratë të rregullt sesi ambasada holandeze i jepte Erion Veliajt 260 mijë euro në 2003-shin, në mënyrë që ai të lidhte kontratë me çdo studio televizive.
Erion Veliaj është investimi më i madh i ambasadës holandeze, ai është politikani më i promovuar prej tyre. Është mbushur sifoni atje, se ambasada nuk ia ka treguar të vërtetën parlamentit të Holandës, se pot ë thuhej e gjithë e vërteta qeverisë holandeze do i kërkohej llogari nga deputetët”, u shpreh Goxhaj.
Avokati paralajmëroi se vendimi i Holandës mund të pasohet edhe nga vende të tjera europiane, pasi fryma kundër shqiptarëve është rritur ndjeshëm. Sipas tij policia ishte përgatitur për arrestimin e tij, nëse do iu afrohej ambienteve ku është vendosur godina e ambasadës holandeze.
