Agron Duka, kreu i PAA-së, ka reaguar pas vendimit të Parlamentit holandes për rikthimin e regjimit të vizave për shqiptarët.
Përmes një postimi në rrjet, Duka shkruan se është e qartë që nuk do të votohet çelja e negociatave në qershor.
“Votimi i Parlamentit holandez për rikthimin e vizave është një kambanë e fortë alarmi për vendin tonë. Pavarësisht se fjalën e fundit mbi lëvizjen e lirë e ka BE-ja, askush nuk mund të jetë aq naiv sa të mendoj se një shtet që kërkon rikthimin e vizave në prill, do të votojë për çeljen e negociatave në qershor.
Tashmë është e qartë se një vend me një Parlament njëngjyrësh, me një krizë të thellë politike dhe besimi kërkon masa të jashtëzakonshme.
Pavarësisht se pak muaj na ndajnë nga vendimmarrja e qershorit, pavarësisht se sfidat e brendshme mund të jenë të shumta, ka ende kohë për ta sjellë vendin në shinat e normalitetit.
Ka ende kohë për ta vendosur interesin kombëtar përpara interesave partiake. Ka ende kohë për të punuar, të gjithë bashkë, për t’i dhënë Shqipërisë perspektivën europiane që meriton”, shkruan Duka.
