Para disa javesh, mimistri i Jashtëm në detyrë, Gent Cakaj shkarkoi diplomatët shqiptarë nëpër botë, që pritej të ndodhte pasi u paralajmërua nga kryeministri Edi Rama për të pastruar imazhin e Shqipërisë sipas tij dhe për t’i dhënë mundësi studentëve ekselentë të përfaqësojnë denjësisht vendin.
Ndër diplomatët e nxjerrë “jashtë loje” ishte edhe Gerarta Ballo. Por nëse për Shqipërinë ajo nuk cilësohet se një kontribut i vlefshëm njerëzor, në Itali ndodh e kundërta, pasi Ballo kandidon për zgjedhjet europiane që do të zhvillohen në 26 maj 2019, si emërtesë e pavarur brenda listës së Partisë Demokratike.
PD është forca kryesore e qendrës së majtë italiane, ndërsa Gerarta kandidon në kolegjin zgjedhor të Italisë së Jugut, ku bëjnë pjesë 6 rajone (Abruzzo, Calabria, Campania, Molise dhe Puglia) me pothuajse 14 milionë banorë.
Gerarta Ballo ka nisur jetën e saj në Itali në moshën 11 vjeçe, ndërsa ka kryer studimet në degën e marrëdhënieve ndërkombëtare dhe ka punuar si gazetare, duke themeluar njëkohësisht disa shoqata.
Ajo e ka përqendruar punën e saj te të rinjtë, emigrantët dhe gjeneratat e dyta, ndërsa në Torino, pothuajse 10 vjet më parë drejtonte edhe një emisionin radiofonik, ‘Shqip in Torino’.
Veç të tjerash, Gerarta është Qytetare Nderi e Lungro-s, bashki arbëreshe e Kalabrisë ku ndodhet selia e Ipeshkvisë së ritit bizantin.
