Ministri i Brendshëm Sandër Lleshaj ka reaguar sërish përmes një postimi në rrjetet sociale, duke i quajtur protestuesit “ekzekutorë”.
“Sapo vizitova policët e plagosur në Spitalin e Traumës. Pasojë e një protestë të dhunshme, të maskuar nga nata dhe maskat e vërteta, si ato që përdor jo rrallë krimi”, janë fjalët që ka zgjedhur të përdorë në postimin e tij ministri.
Ai paralajmëron edhe arrestime, që tanimë kanë nisur. “Organizatorët dhe ekzekutorët e dhunës, kanë sulmuar jo vetëm institucionet kushtetuese dhe Policinë, por edhe qetësinë e qytetarëve, rendin publik dhe imazhin e vendit dhe për këto do të mbajnë përgjegjësi ligjore, publike dhe politike”, shprehet ai në postimin e tretë lidhur me protestën.
Ministri megjithatë nuk ka thënë asnjë fjalë për të lënduarit nga dhuna policore gjatë protestës. dhjetëra persona mbetën të lënduar rëndë nga gazi lotjellës të cilin policia nuk e kurseu as kësaj herë. Pasi protestuesit u zhvendosën nga kryeministria para parlamentit, policia hodhi disa herë gaz lotsjellës.
