Nga Boldnews.al
Parashikimet absurde të Reformës në Drejtësi sjellin në mënyrë periodike situata “qesharake”. Ditën e Enjte, një prej këtyre episodeve butaforike pritet të zhvillohet në Mbledhjen e Përgjithshme të Prokurorëve.
Kryeprokurorja e Përkohshme, Arta Marku, ka njoftuar vartësit e saj në të gjithë Shqipërinë që të mblidhen për të votuar kandidaturën e vetme për vendin vakant të Këshillit të Lartë të Prokurorisë, prokurorin e Shkodrës, Vatë Staka.
Në bazë të njoftimit të Arta Markut, rreth 330 prokurorë të Republikës, me karriera e angazhime të shumta, do të ndërpresin për një ditë të plotë punën për të hedhur votën për kandidatin e vetëm në KLP.
Kjo situatë absurde ka shkaktuar ilaritet në radhët e prokurorëve, të cilët, jo pa ironi shprehen se “po vihemi në rresht për të votuar kandidatin e Frontit Popullor”.
Votimi për një kandidat të vetëm është tipike e sistemit zgjedhor që Shqipëria ka njohur gjatë periudhës së komunizimit. Tashmë, rreth 30 vjet pas vendosjes së pluralizimit, prokurorët e Republikës detyrohen që të mblidhen për të votuar një emër të vetëm.
Vatë Staka, një prokuror thuajse anonim, është njohje e vjetër e Arta Markut. Ata të dy kanë punuar prej vitesh pranë Prokurorisë së Shkodrës, deri sa Marku u emërua në postin e Kryeprokurores së Përkohshme.
Staka ishte i vetmi prokuror i shkallës së Parë që iu përgjigj thirrjes së Arta Markut për të kandiduar për postin vakant në Këshillin e Lartë të Prokurorisë, krijuar pas shkarkimit të Antoneta Sevdarit.
Arta Marku, e cila kishte mundësinë të shpallte sërish garën, për të siguruar rivalitet, vendosi që të organizojë Mbledhjen e Përgjithshme të Prokurorëve për të zgjedhur Vatë Stakën si anëtar të Këshillit të Lartë të Prokurorisë.
Fleta e votimit pritet të ketë vetëm një emër. Por, çfarë ndodh nëse më shumë se gjysma e prokurorëve e nxjerrin të pavlefshme formularin një-emëror? A do të konsiderohet e rregullt procedura për zgjedhjen e anëtarit të KLP?
Sipas sistemit të krijuar nga Arta Marku, sikur një votë të jetë në favor të Vatë Stakës, ajo e tija, ai sërish konsiderohet i kualifikuar për të qenë anëtar në Këshillin e Lartë të Prokurorisë.
Në këtë mënyrë, Kryeprokurorja e Përkohshme siguron një tjetër aleat në KLP, strukturë e cila do të shqyrtojë kandidaturën e saj të pritshme për Prokurore të Përgjithshme me mandat të plotë.
Ndërkohë, prokurorëve të Republikës u mbetet vetëm që të mblidhen të gjithë në Tiranë për “ekskursion”, pasi, ligjërisht, ata janë të detyruar të marrin pjesë në Mbledhjen e Përgjithshme të Prokurorëve.
