Nga Boldnews.al
Grabitja spektakolare në Rinas shënoi kulmin e një mandati të dështuar të Sandër Lleshaj në krye të Ministrisë së Brendshme. I njohur deri më tani vetëm për përdorimin e gazit lotsjellës ndaj protestuesve anti-qeveritarë, ai dhe shefi i tij, Kryeministri Edi Rama duket se kanë kapitulluar plotësisht në luftën kundër kriminalitetit.
Në 3 muajt e parë të vitit 2019, Shqipëria është tronditur nga disa ngjarje të rënda, në të cilat Policia ka dështuar tërësisht në parandalimin e tyre, si edhe, në disa raste tragjike, edhe në identifikimin e autorëve të veprave të rënda penale.
Në 9 Prill 2019, një grup i armatosur hyn pa asnjë problem në pistën e aeroportit të Rinasit dhe vjedhin rreth 10 milionë euro. Pasi largohen, autorët ndiqen nga policia dhe, në një konflikt të armatosur, mbetet i vrarë Admir Murataj. Grabitësit e tjerë ende nuk janë zbuluar.
Në 29 Mars 2019 vriten në Shkodër dy vëllezërit Astrit dhe Brahim Bilali. Viktima Astrit është babai i Astmer Bilalit, i arrestuar pak kohë më parë si pjesë e grupit “Bajri”. Nuk ka asnjë autor të dyshuar deri më tani për këtë ngjarje, pavarësisht se qytetarët shkodranë e kanë të qartë se kush fshihet pas atentateve në seri në kryeqendrën e Veriut.
Në 22 Mars 2019 vritet në qendër të Elbasanit avokat Ravik Gurra, i njohur si mbrojtës i Emiljano Shullazit. Policia nuk ka asnjë pistë dhe asnjë autor për atentatin mafioz.
Në 18 Mars 2019 vritet në një atentat në Tiranë Jurgen Kurti, 26-vjeçari i njohur i jetës së natës. Ai u vra pranë shtëpisë së tij. Autorët e dyshuar për këtë atentat janë 4. Tre prej tyre janë arrestuar, ndërkohë që një i katërt, i dyshuar nga Policia si “koka” e organizimit të atentatit është nuk është arrestuar.
Në 16 Mars 2019 vritet në kodrat e Liqenit Artificial në Tiranë ish-i përndjekur politik, Haxhi Baçinosi. Autori i vrasjes është Islam Myrtaj. Ngjarja kriminale kishte si motiv një raport borxhi financiar mes të dyve. Autori Myrtaj u vetë-dorëzua pak ditë pas ngjarjes. Policia e konsideroi “vetë-dorëzimin” si arritje të saj.
Në 24 Shkurt 2019 vritet në Durrës 45-vjeçari mirditor Martin Ndreca. Policia ka shpallur në kërkim një autor të dyshuar.
Në 18 Janar 2019 vritet në Korçë Altin Balliu, pas një konflikti të rëndomtë me një shtetas tjetër, i shpallur në kërkim nga Policia.
Në 15 Janar 2019 vetëdorëzohet Klemend Balili. Policia e Shtetit dhe qeveria e trajtuan si një fitore të tyre. Por, në fakt, disa pamje treguan se si Balili e shndërroi drejtorin e Përgjithshëm të Policisë, Ardi Veliu, në një “shofer personal” të tijin.
Në 15 Janar 2019 plagoset rëndë në një atentat në Vlorë Mikel Mehmeti. Ai ka qenë në drejtimin e automjetit të tij, në momentin që është qëlluar nga një tjetër mjet në lëvizje. Atentati mafioz vijon të jetë pa autor.
Në 14 Janar 2019, Majlind Lila vret prindërit e ish-bashkëshortes së tij, në zonën e Astirit në Tiranë. Mëngjesin e asaj dite, policia gjeti të vdekur Bujar dhe Xhevahire Mataj. Autori po priste në vendngjarje policinë, për t’u vetëdorëzuar.
Në 13 Janar 2019, një biznesmen nga Durrësi, Elton Kelmendi, u grabit në momentin që po hynte në shtëpinë e tij, së bashku me të birin e mitur. Autorët e grabitjes ishin 3 persona të veshur me uniforma kamuflazhi policor. Asnjë e dhënë për autorët.
Në 10 janar 2019 konstatohet një vjedhje spektakolare armësh në bazën e Pashalimanit. Armë e fishekë të llojeve të ndryshme janë grabitur brenda repartit ushtarak. Deri më tani është arrestuar vetëm roja, për “shpërdorim detyrë”. Asnjë detaj për autorët e grabitjes.
