Gent Ibrahimi, kryetar i KLP-së, deklaroi mbrëmjen e sotme se reforma në drejtësi është super-komplekse, pasi sistemi u kthye përmbys.
“Ka ndryshuar gjithçka, që nga roli i kryeprokurorit, KLD-së, ministrit të Drejtësisë, Gjykatave.
Reforma u bazua në bindjen se sistemi i drejtësisë është i kalbur, por askush nuk parashikonte se sa gjyqtarë dhe prokurorë do të largoheshin.
Ne duhet t’i jemi mirënjohës klasës politike që miratoi një reformë që mund të këpusë edhe degën ku rri politika.
Mund t’ju them se organet e Vetting po keqinterpretojnë ligjin, sikundër ndodhi në rastin e Antoneta Sevdarit. Në këtë rast organet e Vetting nuk kanë lexuar Kushtetutën”, tha Ibrahimi në emisionin “Tempora”.
Ai ka shmangur komentet në lidhje me kreun e Prokrurorisë së Krimeve të Rënda, Donika Prela, duke thënë se i vetmi rast që ka kryer një studim të thelluar ishte ai i znj. Sevdari.
Sipas tij, pjesa e Vetting është shkruar totalisht nga të huajt.
