Një aksident automobilistik u regjistrua mesditën e kësaj të marte në aksin nacional rrugor Korçë-Pogradec.
Ngjarja ka ndodhur rreth orës 14.00 pranë fshatit Vashtëmi, kur një autoveturë tip ‘Benz’ është përplasur fillimisht me mbrojtëset anësore të superstradës e më pas përfundoi në një sipërfaqe toke me pemë.
Dëshmitarë të ngjarjes thanë se mjeti lëvizte me shpejtësi të lartë.
Drejtuesi i mjetit i cili udhëtonte i vetëm, mbeti i plagosur dhe është dërguar në spitalin rajonal të Korçës për ndihmë mjekësore. Ende nuk ka të dhëna për identitetin e të aksidentuarit.
Policia është duke kryer hetimet dhe nuk ka dhënë njoftim për shkaqet e aksidentit. Dyshohet se drejtuesi i mjetit tip ‘Benz’, duke lëvizur me shpejtësi tej normave të lejuara ka tentuar të shmangë përplasjen me një tjetër automjet, që vinte në krahun e kundërt dhe për të evituar përplasjen ka devijuar, duke u përplasur me mbrojtëset anësorë të rrugës.
Në aksin rrugor nacional Korçë-Pogradec janë regjistruar aksidente të shumta automobilistike.
