Konsujve të Nderit do t’u hiqet targat diplomatike nga automjetet që përdorin. Kjo u njoftua sot nga ministri në detyrë për Punët e Jashtme dhe Europën, Gent Cakaj. Ky i fundit pas largimit apo transferimit të mbi 20 diplomatëve, ka ndërmarrë një tjetër hap, atë ndaj Konsujve të Nderit.
Por njëri prej tyre, Përparim Kalo, Konsull Nderi në Danimarkë, e ka konsideruar si një shaka të 1 Prillit deklaratën e bërë nga Cakaj.
E ndërsa i përgjigjet njoftimit të Ministrisë së Jashtme, duke pranuar se targat e automjetit të tij nuk do të jenë diplomatike, Kalo kërkon nga ministri Cakaj të deklarojë publikisht se Përparim Kalo nuk ka bërë shkelje të habitshme, për të kompesuar sadopak dëmin që ka shkaktuar lajmi, i përcjellë me aq bujë në media.
“Jam i nderuar nga Mbretëresha Margreth II e Danimarkës dhe është e padrejtë të çnderohem nga ministër i komanduar i shtetit tim. Përfitoj nga ky komunikim për t’ju përcjellë nderimet e rastit”, shkruan Kalo.
Deklarata
“Shoqata e konsujve deklaron mbi deklaraten e ministrit dhëndër, të presin dt 2 prill, ndoshta ishte një shaka e ministrit me rasin e 1 prillit.
Ju faleminderit për notën verbale e cila përcjell shqetësimin e ministrit të komanduar për saktësimin e rregullave protokollare në fushën e targave CD të automjeteve të Konsujve të Nderit.
Deklarimi se Konsujt e Nderit paskan bërë “shkelje të habitshme duke u pajisur me targa CD”, është në fakt një deklarim i habitshëm, pasi në asnjë vend të botës shteti nuk mund të konsiderojë shkelje, aq më tepër të habitshme, një veprim apo veprimtari të autorizuar prej vetë shtetit, ose organit të tij përfaqësues.
Ndërkohë personalisht konfirmoj se nuk do ta përdor targën CD, por nga ana tjetër kërkoj që ministri të deklarojë publikisht se Përparim Kalo nuk ka bërë shkelje të habitshme, për të kompesuar sadopak dëmin që ka shkaktuar lajmi, i përcjellë me aq bujë në media.
Jam i nderuar nga Mbretëresha Margreth II e Danimarkës dhe është e padrejtë të çnderohem nga ministër i komanduar i shtetit tim. Përfitoj nga ky komunikim për t’ju përcjellë nderimet e rastit”, shkruan Kalo.
