Ish drejtuesi i lartë i Policisë së Shtetit, Ismail Elezi ka komentuar vrasjet e fundit që kanë tronditur qytetin Shkodrës dhe gjithë Shqipërinë.
I ftuar në Syri.net, Elezi ka deklaruar se grupet kriminale në Shqipëri janë të lidhura ngushtësisht me krimin.
Sipas tij, qytetarët nuk kanë më besim te policia.
“Puna e çdo polici matet me rezultatet. Nuk them se nuk do të ketë vrasje, por do të ketë në familje, për një konflikt të çastit. Por ajo që më shqetëson mua janë vrasjet të tipit mafioz dhe krimit të organizuar në Shkodër. Kjo më shqetëson. Vrasja me motive të dobëta ndodh, nuk janë të paramenduara. E ke një indicie, që para 5 ditësh apo 5 muajsh u vra një person, atëherë në dosje duhet të kesh të evidentuar lidhjet e këtij personi, familjare apo shoqërore, për të shkuar te informacioni. Por kjo nuk ndodh. Qytetarët nuk kanë më besim te policia. Mekanizmat e vrasjeve në Shkodër janë të njëjta”,
Si u kthye Shkodra nga qyteti i biçikletave dhe humorit në një qytet që flitet vetëm për krim?
“Nga do ta kthesh kokën të njëjtën situatë ke. Vlora ka 50 njerëz të humbur, ka tritol për ditë. Elbasani ka vrasje. Të gjitha pa autorë. Kështu ka qenë Shkodra? Absolutisht jo. Grupet kriminale që operojnë në Shkodër janë njerëz të lidhur me politikën”, u shpreh Elezi.
