Të shtunën, Skënderbeu përballet ndaj Luftëtarit në Gjirokastër me synimin për të ecur në vazhdën e rezultateve pozitive, pas barazimit me Teutën dhe fitores me Kukësin.
Në konferencën për shtyp, OrgesShehi, si gjithmonë, shumë i matur në deklaratat e tij, ka theksuar se ekipit duhet të japë 100% në Gjirokastër për të fituar. Shehi ka pranuar problemet e sulmit, por ka thënë se ky është një problem i të gjitha skuadrave.
“Nuk ka skuadra të lehta, sidomos në këtë fazë që ka ardhur kampionati. Ndeshja ka rëndësi të veçantë, ndërsa Luftëtari, pavarësisht emrave që ka, të imponon respekt maksimal. Duhet të jemi në 100% të mundësive për ta përballuar me sukses këtë ndeshje.
Çështja e golave është e përgjithshme për kampionatin tonë, nuk është vetëm e jona. Por kuptohet që ne nuk mund të krahasohemi me Skënderbeun që kemi pasur përpara. Kemi një skuadër me çuna të rinj, e rëndësishme është që të dalim mirë në aksion dhe të shkojmë te porta kundërshtare. Do të na pëlqente, sigurisht, të konkludonim dhe të fitonim, duke shënuar sa më shumë gola. Sepse golat do t’u jepnin besim edhe lojtarëve që ne kemi në sulm. Duhet të vazhdojmë punën tonë”, – ka thënë Orges Shehi.
Një mendim të shkurtër për ndeshjen e nesërme në Gjirokastër ka dhënë edhe mesfushori Bruno Dita, i cili ka një mesazh të qartë për Luftëtarin: “të them të drejtën, më bëhet qejfi që ka këtë rritje Luftëtari në lojë dhe me rezultate, nën drejtimin e Ahmatajt. Megjithatë, Skënderbeu ka objektivin e vet dhe Luftëtarin e pret humbja”.
