Gjatë ditës së djeshme, 300 gr tritol kanë shpërthyer në oborrin e një banese në Fushë-Krujë, ndërkohë që përveç dëmeve materiale nuk pati asnjë të lënduar.
Megjithatë, polcia ka vazhduar punën për të zbardhur arsyet që cuan në këtë atentat.Në dëshminë e tij në polici, pronari i makinës dhe shtëpisë në të cilën ndodhi shpërthimi, Afrim Çeku, deklaroi se nuk ka asnjë konflikt me dikë tjetër dhe në skedat e policisë ai rezulton të jetë një njeri pa precedent penal.
“Më datë 27.03.2019, rreth orës 23:10, në fshatin Hasan, Fushë Krujë, në automjetin e shtetasit A.C., të cilin e kishte parkuar në oborrin e banesës së tij , është vendosur një sasi lënde e dyshuar plasëse, e cila ka shpërthyer dhe si pasojë ka vetëm dëme materiale. Grupi hetimor vijon punën për zbardhjen e plotë të ngjarjes, identifikimin dhe kapjen e autorit/ëve”, tha Policia.
Sipas grupit hetimor, pavarësisht se Çeku deklaron se nuk ka probleme me persona të tjerë, ai ka konflikte të hapura, të cilat po verifikohen nga ana e Policisë. Disa persona janë pyetur për këtë ngjarje, mes tyre edhe të dyshuar, por Policia nuk ka asnjë të ndaluar për vendosjen e lëndës plasëse.
Ky ishte rasti i dytë brenda kësaj jave dhe i gjashti prej muajit janar, që konstatohen shpërthime në rrethin e Krujës. Katër ditë më parë, një atentat me eksploziv dështoi në fshatin Mallkuç, ku një sasi lëndë plasëse u gjet poshtë makinës së një 43-vjeçari.
