Kryeministri Edi Rama mbajti një fjalim të gjatë në Kuvend, përpara një salle me deputetë të Rilindjes dhe “opozitës së re” që dëgjonte me vëmendje.
Rama paralajmëroi ndryshimet në Kodin Penal, mori në mbrojtje policinë, foli për luftën ndaj krimit dhe kanabizimit, reformimin e policisë, sulmoi mediat ndërkombëtare, ato shqiptare dhe opozitën.
Por detaji që tërhoqi vëmendjen dhe që s’kishte të bënte me fjalimin e Kreut të Qeverisë, ishte kollarja që Rama kishte vendosur të mbante në këtë seancë, që nisi dhe vijoi në një kohë kur mijëra qytetarë protestonin përpara Kuvendit.
Kollarja e kryeministrit kishte dizenjo kamuflazhi të rrobave ushtarake, që zakonisht përdoren nga trupat ushtarake në beteja apo në luftë.
Nuk dihet se në cilën betejë apo kujt i ka hapur luftë kryeministri, por një gjë është e sigurtë se këtu nuk përfshihen bandat, grupet kriminale, korrupsioni, oligarkët apo droga.
Dhe nëse i referohesh fjalimit të mbajtur sot apo më parë, Rama i ka hapur luftë kujdo që nuk është dakort me të, mediave, opozitës dhe çdo shqiptari që është varfëruar dhe ndjehet më i pasigurtë nën qeverisjen e tij.
