Belinda Ikonomi u largua sot si Drejtoreshë e Përgjithshme e Doganave, ndërsa u zëvendësua nga Arlind Gjokutaj.
Ikonomi i është shtuar listës së drejtuesve të institucioneve qendrore që detyrohen të lënë postet, pas ndryshimeve të shumta qeveritare që u realizuan në fillim të vitit nga Kryeministri Edi Rama.
E ndonëse një pjesë e drejtuesve janë larguar për shkak se konsideroheshin si njerëz të besuar të ish-ministrave, në rastin e Ikonomit si shkak mund të përmendet edhe përplasja që ka pasur me nënkryeministrin Erjon Braçe.
Burime nga Drejtoria e Përgjithshme e Doganave bëjnë me dije se prej 1 jave nënkryeministri ushtronte kontroll përsa i takon zbatimit të orarit në këtë institucion.
Dhe pikërisht për moszbatim orari për disa punonjës, ai kishte kërkuar pezullimin nga detyra ose masa disiplinore penalizuese ndaj tyre.
Burimet shprehen se urdhër-kërkesat e tij janë kundërshtuar nga drejtoresha e larguar, duke krijuar kështu përplasjen mes tij dhe Ikonomit.
Ndoshta këto përplasje i kanë vënë “kapakun” vendimit për largimin e saj si Drejtoreshë e Përgjithshme e Doganave.
Rreth 1 vit më parë, kur Edi Rama inspektonte doganën, pati një problem se lartësia e dyerve ishte e vogël, dhe në atë kohë ai përdori një batutë për Erjon Braçen, që drejtonte komisionin Parlamentar të Ekonomisë.
“Dyert i paskeni bërë që të vijë Erjon Braçe, pasi unë kam problem me lartësinë e tyre”, shprehej në atë kohë Rama.
Duket se kjo batutë, mund t’i ketë mbetur në mendje nënkryeministrit, që për 1 javë ushtroi kontroll te doganat.
Një javë më parë ministrja e Drejtësisë, Etilda Gjonaj, në një konferencë për mediat lajmëroi 13 masat administrative për doganierët në Tiranë, përfshi këtu edhe kryetarin e degës doganore. /Boldnews.al/
