Disa prokurorë kanë keqpërdorur pozicionet, kanë nxjerrë sekretet e hetimit dhe na kanë bërë të ndjehemi keq.
Kështu u shpreh Kryeprokurorja e Përkohshme, Arta Marku , gjatë fjalës së mbajtur në Prokurorinë e Krimeve të Rënda, në kuadër të analizës 1 vjeçare, ku drejtuese është Donika Prela.
Ndërsa e ka cilësuar Prokurorinë e Krimeve të Rënda si më të rëndësishmen, Marku ka kërkuar një hetim për ato çështje që kanë tronditur opinionin publik.
“Disa prokurorë na kanë bërë që të na vijë turp”, u shpreh Marku, por pa përmendur emra konkretë.
Kryeprokurorja theksoi se krimi dhe korrupsioni duhet të luftohen çdo ditë.
Deklarata e Arta Markut
Kjo është prokuroria më e rëndësishme në vend, asnjë veprim i kësaj nuk mund ti shpëtojë opinionit apo politikës. Kjo rrit presionin dhe vështirëson punën tuaj. Keni trajtuar me sukses shumë raste.
Pavarësisht ngarkesës keni treguar se dini të punoni dhe në kushtet e një presioni shumë dimensional, por disa prokurorë të tjerë nga radhët tuaj na kanë bërë që të na vijnë turp, e kanë keqpërdorur duke nxjerrë informacion dhe dokumentacion pa dashur t’ia dinë për ruajtje të sekretit hetimor.
Ata kanë harruar të bëjnë detyrën dhe të kryejnë hetime aty ku duhet të kryheshin. Disa nga temat kanë trazuar politikën në vend, madje kushdo i njeh edhe me numra dhe kjo nuk mund të jetë situatë normale. Secili e di që janë mbajtur në sirtar për t’u përdorur për interesa të caktuara, por detyra është juaj është hetimi dhe zbardhja, këtë duhet ta bëni me çdo kusht.
Ky është një organ hetimi dhe jo supermarket që çdo gjë ka cmim. Prokuroria për krimet e rënda ka qenë më cilësore ka ardhur në rënie për shkak të ndërthurjes së punës me interesa personale.
Ju kërkoj të fokusoheni te puna, hetoni çështjet që kanë trazuar jetën politike, hetimi të jetë objektiv, mbani larg mediat, gazetarët nuk duhet të jenë pjesë e grupit hetimor, sikur po i trajtoni ju. Hetimi pasuror le për të dëshiruar. Ushtroni kompetencat e plota deri në ngritjen e SPAK, krimi dhe korrupsioni duhet të luftohen çdo ditë.
