Elvin Hysa, 35-vjeç, mbyti një ditë më parë bashkëshorten e tij 32 vjeçaren Gurie Hysa, me të cilën kishte tre fëmijë.
Krimi i ndodhur në Gramsh ka tronditur banorët, ndërsa shkak për ngjarjen e rëndë ishin dyshimet që kishte 35 vjeçare ndaj bashkëshortes së tij.
Sikundër raportohet, pak para se të flinin burrë e grua kanë pasur debate të forta në dhomën e tyre lidhur me tradhëtinë.
35-vjeçari dyshonte se gruaja e tradhëtonte dhe nën dyshime të tilla ka pritur sa ta zërë gjumi, ndërsa e ka mbytur 32-vjeçaren me jastëk.
Krimin e rëndë nuk e ka kuptuar asnjë, deri në momentin që Elvin Hysa ka dalë nga dhoma duke i thënë babait të tij 62-vjeçar e kishte mbytur gruan.
Çifti banonte në fshatin Grekan të Gramshit. Fëmijët kishin shkuar për vizitë tek gjyshi i tyre në Berat.
Burime nga grupi hetimor thanë për Report Tv, se pas aktit të rëndë, 32-vjeçari ka lënë babain në shtëpi me nusen e pajetë dhe me një mushkë që kishin, ka shkuar tek motra e tij në Lumras të Beratit, shkruan shqiptarja.
Ajo është personi që e ka bindur të dorëzohet në polici. Në gjendje të rënduar psikologjike pas mbytjes së gruas, Elvin Hysa është rikthyer sërish në banesën e tij, aty ku edhe u kap në flagrancë nga forcat e policisë së Gramshit.
Teksa është shoqëruar nga uniformat blu, autori i krimit mësohet t’i ketë thënë babait të tij të moshuar që të kujdeset për tre fëmijët. Pranë hetuesve ai ka shfaqur pendesë. Çifti jetonte në kushte shumë të vështira ekonomike, në një shtëpi thuajse të rrënuar.
