Kongresi i Partisë Socialiste, i cili zhvilloi punimet dje, nuk përcaktoi kandidatët për kryebashkiakë në të paktën dy qytete kryesore, Durrësin e Shkodrën.
Arsyet mund të jenë të shumta, por më kryesorja mbetet ajo e përplasjes së klaneve brenda Rilindjes për të përcaktuar emrat që do të përfaqësojnë PS-në në proçesin zgjedhor për kryebashkiakë.
E ndërsa në Tiranë dhe Korçë u rikonfirmuan Erjon Veliaj dhe Sotiraq Filo.
Në Lezhë u promovua Pjerin Ndreu, në Fier do të rikandidohet Armando Subashi, në Vlorë, Dritan Leli, në Shijak Ilir Ndrazhi, deputet aktual i PS-së, në Malësinë e Madhe, Tonin Marinaj dhe në Tepelenë, Tërmet Peçi. Ndërkohë në Elbasan u promovua Gentian Llatja, që zëvendëson Qazim Sejdinin.
Pra nga ajo çfarë ka mbetur pezull janë emrat e kandidatëve për dy bashkitë ndër më të mëdhatë në vend.
Pavarësisht se zgjedhjet vendore rrezikojnë të mbahen për shkak të qëndrimit të opozitës, e cila nuk do të pranojë të hyjë në një proçes sa kohë kryeministër do të jetë Edi Rama, formalisht Rilindja është përgatitur për të hyrë edhe e vetme në zgjedhje.
Madje nëse i referohemi deklarimeve publike dje në Kongres, euforia për të fituar 61 bashkitë pa pasur një garë reale, ishte e madhe.
Në Durrës, duket se rikandidimi i Vangjush Dakos mund të shkaktojë probleme, për shkak se emri i tij rezulton i përfshirë në dosjen 339, që po hetohet nga prokuroria për shit-blerje votash.
Në këto kushte janë të paktën 4 emra që garojnë për Kryebashkiak të Durrësit nga rradhët e socialistëve, nëse vendimi përfundimtar i Edi Ramës, do të jetë për të moskandiduar Dakon.
Ardian Çela, ish-nënkryetar i Bashkisë së Durrësit, dhe drejtor i OSHEE, Spartak Kovaçi, drejtor i Ujësjellësit në Durrës, Arbër Braho, nënkryetari aktual i Bashkisë Durrës, dhe Rovena Voda, zv.ministre e Brendshme, janë në një garë për të fituar besimin e drejtuesve socialistë, për marrjen e mandatimit për kryebashkiakë. Çështja e kandidaturës së PS-së për bashkinë e Durrësit duket se ka lidhje me atë që nga do të anojë kryebashkiaku actual, Vangjush Dako, nëse ai nuk rikandidon për një tjetër mandate.
Në anën tjetër në Shkodër, përveç ish-zv.kryeministres Senida Mesi, deputete e PS-së, në garë është edhe mjeku Astrit Beci. E njëjta situatë është edhe në Shkodër, ku duket se ka përplasje mes deputetëve dhe kandidatëve që përfliten, apo klaneve që i mbështesin ato.
Qoftë për Durrësin ashtu edhe për Shkodrën, duket se përplasjet mes klaneve kanë detyruar Kryeministrin Rama që në kongresin e djeshëm të socialistëve, qoftë edhe formalisht të mos përcaktojë kandidatin, ose të promovojë një emër, ashtu sikundër ka ndodhur me bashkitë e tjera në vend. /Boldnews.al/
