Krimet e Rënda kanë marrë në dorë zbardhjen e vrasjes së avokatit Ravik Gurra, ngjarje e ndodhur mbrëmjen e djeshme në qytetin e Elbasanit.
Mësohet se prokurori që do të drejtojë hetimet është Behar Dibra, i Prokurorisë së Krimeve të Rënda, i cili ka udhëtuar drejt qytetit të Elbasanit.
50-vjeçari Gurra u qëllua me dy plumba në kokë, nga një person i maskuar. Ekzekutimi i avokatit, të njohur si mik i Çapjave, por edhe mbrojtës ligjor i Emiljano Shullazit, është kryer me një pistoletë me silenciator.
Dyshimet janë që krimi të jetë kryer për shkak të detyrës, ndërsa është klasifikuar si “vrasje të funksionarëve publikë”.
Avokati ishte ulur, bashkë me dy miq të tij, në ambinetet e jashtme të një lokali, pranë Kalasë së Elbasanit, kur një person është afruar në këmbë dhe e ka qëlluar me armë në kokë duke e lënë të vdekur në vend.
Autori, dyshohet të jetë larguar me një automjet Mercedez Benz me targë AA 934 HU, e cila u gjet e djegur nga policia.
Policia ka sekuestruar kamerat e disa bizneseve në zonë, ndërsa janë marrë në pyetje dhjetra persona.
Në mbrëmjen e djeshme, RENEA ka ngritur disa postoblloqe në qytetin e Elbasanit, me qëllim kapjen e personave të dyshuar në këtë krim.
Referuar Neni 79/a të Kodit Penal, vrasja e funksionarëve publikë parashikon:
(Shtuar me ligjin nr. 144/2013, datë 2.5.2013)
Vrasja me dashje e deputetit, gjyqtarit, prokurorit, avokatit, ushtarakut apo e funksionarëve të tjerë publikë, gjatë detyrës ose për shkak të saj, kur cilësitë e viktimës janë të dukshme ose të njohura, dënohet me burgim jo më pak se tridhjetë vjet ose me burgim të përjetshëm.
