Në rastet kur kampionati ndërpritet për shkak të impenjimeve të ekipit kombëtar, skuadra e Superiores organizojnë miqësore për të ruajtur gjendjen fizike. Në këtë kuadër, Skënderbeu, që vjen pas fitores me Kukësin fundjavën e kaluar, do të luajë nesër një miqësore.
Kundërshtar do të jetë ekipi U-19 i Skënderbeut. Një test që do t’i shërbejë trajnerit Orges Shehi për të t’i mbajtur futbollistët në tonus. Skënderbeu e ka me Luftëtarin ndeshjen e radhës dhe në Gjirokastër shkon pa Leonit Abazin, i cili u ndëshkua me karton të kuq ndaj Kukësit. Vendin e tij pritet ta marrë Pëllumbi.
Stafi teknik e ka parë të udhës që ta testojë grupin me ekipin e 19-vjeçarëve, për të mos rrezikuar ndonjë dëmtim në këtë fazë të kampionatit. Ndoshta në fundjavë mund të ketë një tjetër miqësore me ndonjë ekip fqinj, por për momentin nuk është vendosur. Nesër Skënderbeu do të zbresë në fushë për të zhvilluar testin brenda familjes.
