Nga Boldnews.al
Policia e Tiranës ka shpallur në kërkim Dervis Arapin, djalin e Agim Arapit, i cili mbetur i vdekur në vitin 2017 pas një sherri të dhunshëm me Jurgen Kurtin, i cili u vra në një atentat të Hënën e kësaj jave, si edhe me shtetasit Konstandin dhe Kujtim Ekonomi.
Policia e ka referuar materialin në Prokurori për veprën penale të “vrasjes për gjakmarrje” dhe ka si të dyshuar kryesor djalin e Agim Arapit.
Familja Arapi dhe Jurgen Kurti kanë pasur një përplasje të vazhdueshme në prillin e vitit 2017, për shkak të një ambjenti me qera në pallatin ku jetonte Agim Arapi. Konflikti mes tyre ka arritur kulmin në 11 Prill 2017, kur, pas një sherri të dhunshëm, mbetet i vdekur Agim Arapi.
Që në momentin e parë, policia arrestoi për këtë ngjarje Konstandim Ekonomin, vjehrrin e Jurgen Kurtit, si edhe vëllain e tij, Kujtim Ekonomi. Ndërkohë, për shtetasin Jurgen Kurti prokuroria e Durrësit nuk kreu asnjë hetim.
Bashkëshortja e Agim Arapit, Vjollca, ka akuzuar shpesh Jurgen Kurtin për vdekjen e familjarit të saj. Por, prokurori i Durrësit, Bledar Bejko nuk i ka vlerësuar deklarimet e Vjollca Arapit dhe famijarëve të tjerë të viktimës, Agimit.
Vjollca Arapi ka akuzuar shpesh organet ligjzbatuese në Durrës, përfshirë policinë dhe prokurorin e çështjes, Bejko, për korrupsion gjatë hetimit të vdekjes së bashkëshortit të saj.
Sipas Vjollcës, prokurori ka toleruar Jurgen Kurtin, pasi, sipas saj “ai ishte njeri me lidhje të forta në politikë dhe me shumë para”.
Nga aktet e Gjykatës së Durrësit, rezulton prokuroria e qytetit bregdetar në datë 12.04.2017 ka urdhëruar regjistrimin e procedimit penal Nr. 602, në ngarkim të shtetasve Kostandin dhe Kujtim Ekonomi, për veprën penale të “Vrasja me dashje”, në bashkëpunim, parashikuar nga neni 76-25 i Kodit Penal, në dëm të shtetasit Agim Arapi.
Rreth 3 muaj më vonë, në datë 11.07.2017 prokurori i çështjes Bledar Bejko ka marrë vendimin “Për pushimin e hetimeve dhe lirimin e menjëhershëm të të dyshuarit Kostandin Ekonomi” me motivacionin se nuk provohet se i pandehuri e ka kryer veprën penale(Neni 328/1/dh i K.Pr.Penale).
Vetëm një ditë më parë, në datë 10.07.2017 prokurori i ka njoftuar të pandehurit Kujtim Ekonomi akuzën për kryerjen e veprës penale të “Vrasja nga pakujdesia”, parashikuar nga neni 85 i K.Penal dhe në datë 12.04.2017 ka përpiluar kërkesën duke e sjellë në gjykatë çështjen penale në ngarkim të tij.
Pra, edhe nga aktet e dorëzuara në gjykatë, rezulton se prokurori Bejko nuk e ka përfshirë në hetim shtetasin Jurgen Kurti. Ndërkohë, nga dy personat e arrestuar fillimisht, prokurori ka konkluduar që të akuzojë vetëm Kujtim Ekonominë për vrasjen e Agim Kurtit.
Gjithasht, rezulton se prokurori në gjykatë ka shkuar me një akuzë më të lehtë, se sa ajo për të cilën ka nisur hetimin dhe që pretendojnë prej kohësh edhe familjarët e Agim Arapit.
Fillimisht, Kujtim dhe Kostandin Ekonomi janë arrestuar për veprën penale të “vrasjes me dashje”. Por, në përfundim të hetimeve, prokurori Bledar Bejko ka akuzuar vetëm Kujtim Ekonomin dhe vetëm për “vrasje nga pakujdesia”.
Në bazë të kërkesës së Prokurorisë, gjykata e Durrësit dënoi Kujtim Ekonomin me 5 vjet burgim.
https://www.facebook.com/boldnews.al/videos/396201804492623/?v=396201804492623
