Zv.ministri i Brendshëm, Besfort Llamallari, e ka cilësuar si tension të kotë situatën e krijuar te Unaza e Re, ku banorët protestuan për më shumë se 4 orë, pas një informacioni se do të kishte arrestime të tyre.
Banorët që protestojnë prej 136 ditësh u vizituan edhe nga kreu demokrat, Lulzim Basha, që konfirmoi urdhërin politik, që sipas tij, është dhënë nga ministri i Brendshëm apo Kryeministri, për të arrestuar gjatë natës protestuesit.
Por zv.ministri i Brendshëm theksoi se policia e ka për detyrë që të jetë sa herë ka protesta. Ai tha se për organizimin e protestave ka një ligj, duke shtuar se në rastin konkret ky ligj është shkelur.
“Nuk ka urdhër politik, policia ka zbatuar detyrën ligjore për të qenë prezente sa herë ka protesta. Nuk ka asnjë arsye pse policia duhet të fshihet, mendoj se është një tension i kotë. Situata po shfrytëzohet politikisht”, tha Besfort Llamallari
