Jurgen Kurti, i njohur si menaxher i VIP-ave, por edhe i dyshuar për dy vrasje njërën në 2016 dhe tjetrën në 2017, u qëllua për vdekje mbrëmjen e sotme në Tiranë.
Ngjarja e rëndë ka ndodhur në zonën pranë sheshit Wilson dhe stadiumit Selman Stërmasi, ku Kurti u qëllua nga një makinë.
Viktima ishte në këmbë dhe sa kishte dalë nga palestra, ndërsa dyshohet se automjeti që u përdor në krim ishte një Mercedez.
Mbi të është qëlluar 10 herë, ndërsa mendohet se në krim kanë marrë pjesë të paktën dy persona.
Policia ka shkuar në vendin e ngjarjes ku ka rrethuar zonën, ndërsa Kurti humbi jetën gjatë transportit për në spital.
Policia ka ngritur postoblloqe në pika të ndryshme të kryeqytetit, ndërsa po sekuestrohen kamerat në zonë, për të bërë të mundur identifikimin e autorit/ëve.
Ngjarjet kriminale
Kurti u akuzua në 2016 për vrasjen e babait të tij. Lidhur me këtë ngjarje në dosjen e Prokurorisë shkruhet “i pyetur për këtë ngjarje, shtetasi Jurgen Kurti ka deklaruar se rreth orës 19:00 ka rënë dera e banesës së tyre dhe ka dëgjuar babain e tij Arturin të bërtiste, shante dhe ofendonte nënën e tij, por ata nuk e kanë hapur derën dhe ai ishte larguar nga banesa.
Pasi është larguar babai i tij nga banesa, nëna e tij ka njoftuar në telefon vëllain e saj (njëkohësisht dajën e tij), shtetasin Leonard Ristani, i cili ka mbërritur aty. Në banesë në këtë moment ndodhej veç nënës, dajës edhe shoqja e nënës e quajtur K..
Në këtë moment ka marrë në telefon viktima dhe telefonin e ka ngitur Leonardi, të cilin ai e ka sharë dhe ofenduar.
Rreth 15 minuta pas kësaj telefonate ka rënë zilja e derës dhe për të hapur derën ka shkuar Leonardi.
Pasi ka hapur derën, i ati i tij Arturi ka filluar të shtyhej me Leonardin dhe në një moment, i ati i tij ka nxjerrë një thikë të madhe me bisht të kuq dhe menjëherë Leonardi është tërhequr për në brendësi të banesës, pasi ndodheshin te dera e jashtme.
Me këtë thikë, viktima po godiste Leonardin, i cili është rrëzuar në dysheme dhe po godiste me këmbë për të mos lejuar Arturin t’i afrohej me thikë.
Në këtë moment ka parë që babai i tij ka ecur dy-tre hapa për nga dera e jashtme dhe i gjakosur në pjesën e kraharorit ka rënë në korridorin para derës së jashtme.
Ai më pas ka shoqëruar Leonardin për në Spitalin e Traumës për të marrë ndihmë mjekësore”.
Pas ngjarjes së rëndë ku mbeti viktimë i ati, emir i Jurgen Kurtit do të përfshihej në një tjetër krim, atë të ndodhur në Durrës, ku mbeti i vrarë Agim Arapi. Lidhur me këtë ngjarje u arrestuan edhe dy persona të tjerë, ndërsa për krimin u dënua vetëm njëri prej tyre. Kurti nuk u hetua, ndërsa vrasja u klasifikua si nga pakujdesia.
Në fashikujt hetimor thuhet se thika e përdorur në konflikt mes viktimës dhe autorit është përdorur nga ana e viktimës dhe e ka poseduar ai e jo autori. Ndërsa dy personat e tjerë, Jurgen Kurti dhe K. E nuk janë hetuar më në vijim. Pavarësisht se në fillim, kur ngjarja u bë publike, janë ndaluar të tre si autorë të dyshuar të ngjarjes.
Menaxheri i VIP-ave
Jurgen Kurti, përtej ngjarjeve kriminale ku rezultoi i përfshirë, direkt ose indirekt, njihej si djaloshi pasanik i ekraneve, që e kishte tejkaluar famën metropolitane, duke u shndërruar në një personazh televiziv që fliste për jetën e tij luksoze.
Ai pëlqente argëtimet ekstreme me jet ski, apo frekuentimin e club-eve verore të shtrenjta të Jugut, në shoqërinë e miqve të tij.
Më herët në media të ndryshme kishte deklaruar ambicien e tij për t’u pasuruar, edhe pse shumë i ri në moshë. Ai kishte regjistruar në QKR një shoqëri, që figuronte si pronar i 10 bizneseve fitimprurëse në Shqipëri.
Njoftimi i policisë
Policia e Tiranës njofton se “Rreth orës 22:20, në rrugën “Zef Jubani”, në rrethana ende të paqarta është vrarë me armë zjarri shtetasi J. K., rreth 26 vjeç.
Grupi hetimor po punon për zbardhjen e rrethanave të ngjarjes, identifikimin dhe kapjen e autorit/ve.
Sherbimet e Policisë po krehin zonën si dhe janë ngritur pika kontrolli për kapjen e autorit/eve
