Policia ka ngritur grupe kontrolli në pikat hyrëse të Tiranës, si dhe në ato në dalje të disa prej qyteteve kryesore të vendit. Këto janë pjesë e planit të masave të policisë lidhur me protestën e thirrur nga opozita në bulevardin Dëshmorët e Kombit.
Nga raportimet mësohet se automjetet që hyjnë në Tiranë i nënshtrohen kontrolleve, ndërsa policia mban shënim targat e automjeteve. E njëjta gjë ndodh edhe në pikat dalëse të qyteteve kryesore, ku policia ka ngritur postoblloqe me qëllim kontrollin e mjeteve.
Nga raportimet mësohet se kontrollet më të rrepta janë pranë Fierit dhe Elbasanit, ku disa autobuzë me mbështetës të opozitës janë ndaluar për minuta të tëra, ndërsa policia ka ushtruar kontroll, qoftë të mjeteve ashtu edhe duke kërkuar mjetet e identifikimit të udhëtarëve.
Ndërkohë në Tiranë janë angazhuar mbi 1300 punonjës policie, që do të përqëndrohen kryesisht pranë godinës së Kryeministrisë, atje ku do të mbahet edhe protesta e opozitës. Forcat e Gardës së Republikës do të jenë të përqëndruara në ambientet e brendshme të Kryeministrisë, ndërsa ato special, RENEA dhe FNSH janë të pozicionuara në ambientet e pasme të godinës, dhe në pjesët anësore të saj.
Në kuadrin e masave, zona rreth kryesminitrisë është rrethuar, ndërsa janë instaluar kamerat shtesë për të identifikuar protestues që mund të ndërmarrin akte të dhunshme.
