Marrëveshje si ajo e 17 Majit mes opozitës dhe mazhorancës nuk mund të ketë. Kështu u shpreh nënkryetari i PD-së, Edi Paloka, në studion e A2CNN, ku foli për aksionin e opozitës, si dhe për deklaratat e faktorit ndërkombëtar dhe mundësinë e një marrëveshje.
“Nëse bëhet fjalë për marrëveshje të tipit të 17 majit nuk mund të ketë. Kushtet tona janë të qarta. Rama nuk mund të ketë më rol në politikën shqiptare. Siç e tha dhe Basha, marrëveshja me Ramën nuk ishte vetëm në dëm të PD, por edhe në dëm të shqiptarëve dhe tashmë një marrëveshje me Ramën është e përjashtuar”, theksoi Paloka.
Lidhur me qëndrimin e ndërkombëtarëve, Paloka tha se sa më shpejt të gjitha palët duhet të kuptojnë zgjidhja nuk është duke sulmuar opozitën.
“Topi është në fushën e Ramës dhe vendimet duhet t’i marrë ai. Të tjerët duhet të kuptojnë se veprimet e opozitës janë pasoja të kësaj mazhoranca”, theksoi Paloka.
Përsa i takon vizitës së Kryeministrit Edi Rama në Itali, Paloka u shpreh “unë di se ka paguar boll për të bërë atë xhiro. Por unë kam përshtypjen se ka dhënë efektin e kundërt nga ato që thotë Rama”.
“Imazhi i Shqipërisë është prishuar kur vendi ynë është cilësuar si Kolumbia e Europës, është prishur kur në Parlament futen kriminelë, është prishur kur të gjitha stacionet e huaja transmetuan se si krimi me paratë e drogës ka blerë zgjedhjet. Rama në këtë mënyrë, Rama po përpiqet të dalë nga gropa duke gërmuar, por kjo gjë nuk mund të ndodhë. Nëse gërmon, gropën e bën më të thellë”, theksoi Paloka.
