Ndeshja mes Teutës dhe Skënderbeut ka qenë një përballje mes shumë ish-ësh në të dyja kampet. “Panorama Sport” sjell momentet pikante.
* Presidenti i Teutës, Edmond Hasanbelliu, e pa ndeshjen në shoqërinë e aksionerit Ardian Bardhi dhe drejtorit sportiv të Skënderbeut, Haris Fakiç.
* Para se të fillonte ndeshja, Shkëmbi shkon te stoli i Skënderbeut dhe përqafon Orges Shehin. Të dy trajnerët janë takuar edhe në fund.
* Tifozët durrsakë mbështesin pa kushte gjatë gjithë takimit Teutën, teksa tifozët miq fillojnë të largohen pa mbaruar ndeshja.
* Pas fërshëllimës së trefishtë të kryesorit, shpërthejnë tifozët e Teutës, duke kontestuar ashpër për gjykimin.
* I pranishëm ishte edhe trajneri i Kombëtares U-21, Alban Bushi.
* Bruno Dita dhe Nazmi Gripshi, dy ish-lojtarë të Teutës, rikthehen në Durrës si kundërshtarë, ndërsa Osmani, Bicaj e Progni luajnë përballë së shkuarës së tyre. Shkëmbi dhe Shehi përballen me ish-ekipet.
* Radas, në përfundim të pjesës së parë ironizon arbitrin për 11- metërshin e dhënë në favor të Teutës. Madje ai rrezikon shumë, pasi mund të ndëshkohej me të kuq, por kryesori Kola e fal.
* Trajneri Shehi, me të përfunduar pjesa e parë shkoi dhe bisedoi me kapitenin Radas, ku i kërkoi të qetësohej. Një veprim, i cili tregoi se edhe ai ishte kundër gjyqtarit që akordoi penalltinë.
* Nazmi Gripshi shënon, por nuk feston dhe ngre duart duke kërkuar falje në shenjë respekti ndaj ekipit ku nisi karrierën si futbollist.
