Baton Haxhiu, analist i afërt me Kryeministrin Edi Rama, pohoi mbrëmjen e sotme se kjo qeveri nuk e mbyll mandatin e plotë deri në 2021.
Por për Haxhiun shkaku është fakti se Rama do të shkojë në zgjedhje të parakohshme pasi dy partitë politike, PD dhe LSI, nuk do të mund të fitojnë zgjedhjet, për shkak se janë të konsumuara për shkak të politikës që ndjekin.
Baton Haxhiu pohoi se qeveria e ka ditur për bandat që grabisnin votat në zgjedhje.
“Pushteti i kriminalizuar në Shqipëri nuk daton me ardhjen e Ramës, por daton që prej vitit 1991.
Sistemet juridike që kanë një traditë korrupsioni është e vështirë të çrrënjosen pa ndërhyrjen e ndërkombëtarëve.
Arta Marku që nga diskursi i saj duket se nuk ka potencë për të fuqizuar sistemin e drejtësisë, por në tranzicion duhen njerëz të tillë, sepse njerëz që janë të dobët e me më pak potencë, vendosen të tillë njerëz.
Zgjedhjet në Shqipëri është e vërtetë që në disa zona janë përcaktuar nga kriminelë.
Me vazhdimësi, këto institucione do fitojnë betejën me kriminelët”, tha Baton Haxhiu
Haxhiu tha se në zgjedhjet lokale do të ketë një opozitë që do të hyjë, duke shtuar se nuk ka rëndësi fare nëse PD dhe LSI marrin pjesë në këto zgjedhje.
“Zgjedhjet në Shqipëri do të jenë në prill ose maj të vitit 2020, pasi BE zhvillon zgjedhjet në majin e 2019-ës, institucionet e BE-së ngrihen në nëntor të po këtij viti, ndërsa i duhen 3-4 muaj kohë sat ë ambientohen, çka do të thotë se BE do të merret me Shqipërinë në shkurt të 2020”, tha Haxhiu.
Analisti, i njohur për mbështetjen ndaj Ramës, në emisionin “Zonë e Lirë” ka vënë theksin në atë që në Shqipëri do të lindë një opozitë e re, duke parashikuar zhbërjen e asaj aktuale. Sipas tij, Shqipërisë i duhet një parti si Vetëvendosja.
