Petrit Vasili, ish-deputet i LSI-së, ka reaguar ashpër ndaj deklarimeve në Tiranë të europarlamentarëve, që janë shprehur kundër dorëzimit të mandateve nga opozita dhe i kanë bërë thirrje kandidatëve në lista të partive opozitare të plotësojnë vakancën.
Vasili, në studion e News 24, tha se nuk mund të pranojë nga kurrkush, qoftë ky evropian apo çfarëdo lloj gjuhe që të flasë, imponimin e standardit të të pranuarit të votës së blerë nga krimi i organizuar.
“Unë nuk mund ta pranoj dot që një eurodeputet i caktuar të më thotë që zgjedhjet u certifikuan në atë kohë. Nuk mundem kurrsesi që unë të pranoj nga kurrkush, qoftë ky evropian apo çfarëdo lloj gjuhe që të flasë, i cili do të më imponojë standardin e të pranuarit të votës së blerë nga krimi i organizuar.
Ky nuk është më pretendim, por është provë dhe fakt. Asnjë shqiptar nuk ka më nevojë të më dëgjojë mua. i ka mjaftuar të dëgjojë dhe të rimarrë mjaft e mjaft argumente”, tha Vasili.
Më tej ai tha se Europa, përballë korrupsionit, nuk kurseu as “gjigandë si Kohl dhe Kraksi”
“Tani po kthehem dhe po u jap nja dy shembuj këtyre europianëve që vijnë këtu. Ne e dimë që Europa është treguar shumë e prerë , në kuptimin në respekt të ligjit, dhe nuk ka kursyer kolloz si Helmut Kohl. Ju e dini shumë mirë që zoti Kohl, i cili realizoi sipërmarrjen më të jashtëzakonshme të bashkimit të dy Gjermanive, një kryevepër politike, për disa çështje të financimit të partisë, ju e dini që u dënua nga gjykata. Një kolloz i politikës botërore.
Italia krenohet se ka pasur një kryeministër nga më të mëdhenj të të gjitha kohërave Bettino Craxi, që për çështjen e financimit të partive mbylli jetën e tij në Hamamet, pasi drejtësia deri në fund qëndroi e fortë. Ju e dini shumë mirë që rënia e Republikës në Itali, ra për shkak të historive të korrupsionit, që në disa raste ishin shumë të vogla sesa shifrat e tmerrshme këtu. Dhe pranoi Italia dhe mori kurajën që të rrëzonte një sistem të tërë politik. Dhe një grup i madh partish nuk ekzistojnë më në skenën politike italiane, për të ngritur një republikë të re, sepse kjo republikë e korrupsionit nuk mund të ekzistonte më“, u shpreh Vasili.
