Prej dy javësh, Viola Spiro ka nisuremisionin më të ri sportiv në Klan Plus. Për të na treguar më shumë rreth kësaj eksperiencë të re për të, Viola ka qenë e ftuar pasditen e sotme në emisionin “Rudina” në Tv Klan.
Ajo thotë se kjo është një sfidë e re, ndryshe nga emisioni i kaluar që bënte një herë në javë. “Sport Plus” vjen çdo mbrëmje në orën 19:30 pas edicionit informativ të lajmeve në Klan Plus.
Megjithatë, gazetarja shprehet se është e kënaqur me këtë ritëm, sikurse thotë dhe vetë, pasi e ndihmon të jetë gjithmonë e përditësuar me informacione.
“Kam ndryshuar ndoshta zyrën sepse po bëj të njëjtën gjë. Vetëm ideja që është diçka e përditshme, është pak më impenjative, por që mua më pëlqen. Nuk kam parë, të paktën në Shqipëri, të ketë një edicion të mirëfilltë përsa i përket lajmeve sportive. Studio është ndër më të bukurat që kam qenë, që kam prezantuar. Ndriçimi, gjithçka, hapësira janë dy studio bashkë dhe më motivon edhe më shumë. Pas edicionit qëndron të lajmeve vjen Sport Plus në Klan Plus”.
Viola zbulon edhe një sekret të vogël të saj. Përveç angazhimit që ka në televizion, punon me kohë të pjesshme edhe në një kompani private ku mbulon sektorin e marrëdhënieve me publikun. Viola Spiro ka përfunduar studimet për financë, por thotë se do të donte të ndiqte edhe juridikun.
Viola Spiro: “Jam në një kompani private e punësuar, por atje e kam kthyer part-time sepse pranova dhe këtë ofertën tjetër. Jam në dy punë. Nuk e kisha provuar ende në dy punë. Mund të them që jam pak e lodhur, sepse nga një përqëndrim tjetër kaloj në një tjetër, por që atje jam gjithë kohës me të huaj dhe duke folur anglisht. Më pëlqen, kam përfunduar studimet për financë dhe doja ta provoja dhe këtë punën tjetër. I dua të dyja”.
Nëse do të duhej të zgjidhte mes të dyjave, Viola thotë: “Për momentin do vazhdoja me televizionin, me këtë eksperiencë që po krijoj dhe ndaj po e krijoj që ta kem në vazhdimësi”.
Rudina Magjistari: “Do kishe dashur të bëje dhe diçka tjetër në jetë përveç këtyre dy profesioneve, televizionit dhe ekonomikut, degën për të cilën ke studiuar”?
Vila Spiro: “Do isha një avokate e mirë. I urrej padrejtësitë dhe ndoshta jam bërë pishman që kam ndjekur ekonomikun, prapë avokate mund të isha më mirë”.
