Skënderbeu po kalon momentin më të keq që prej shumë vitesh nuk ishte parë në këto anë. Kampionët në fuqi janë zhytur në krizë të thellë rezultatesh, aq sa nuk dihet se kur do të dalin prej andej.
Në nëntë javët e fundit të kampionatit, që përkon me një fazë të plotë, korçarët kanë mundur të grumbullojnë vetëm tri pikë, duke bërë kështu paraqitjen më të keqe të këtij sezoni nga të gjitha ekipet e Kategorisë Superiore.
Asnjë skuadër nuk ka arritur të bëjë më keq se Skënderbeu, që në nëntë javë koleksionon plot tetë humbje dhe një fitore. Një mesatare mjaft e ulët kjo, që përkon me një ekip që rënien nga kategoria nuk e shpëtonte dot.
VARËSIA NGA BREGU – Si të mos mjaftonin rezultatet negative, duket se Skënderbeu i këtij sezoni është gjithnjë e më shumë i varur nga një lojtar. Mungesa e Dejvi Bregut është më e rëndësishme nga sa mendohej të ishte dhe kjo e përkthyer në shifra del se bardhekuqtë nuk kanë mundur të marrin dot rezultate pozitive sa kohë Bregu është jashtë ekipit, përveç ndeshjes me Laçin.
MBLEDHJA – Pas humbjes me Tiranën duket se nuk kanë mbajtur më nervat e Ardjan Takajt, i cili duke parë edhe shfaqjen e shëmtuar të ndodhur në fund të takimit me përplasjen me tifozët, ka vendosur të thërrasë skuadrën në një mbledhje urgjente në Durrës. Nuk dihet ende se çfarë vendimi do të marrë Ardjan Takaj në këtë mbledhje, por një gjë është e sigurt se tonet nuk do të jenë aspak të qeta. Një krizë rezultatesh e tillë nuk ishte parë në këto anë prej vitesh tashmë dhe duket se Takaj është mërzitur mjaft nga situata e krijuar.
Nëse trajneri vijon të jetë i paprekshëm nga ana e presidentit, e njëjta gjë nuk mund të thuhet për futbollistët ndaj të cilëve mund të ketë masa edhe me gjoba për mosimpenjim sa duhet në një ndeshje. Mënyra se si ekipi nuk reagon në momente të caktuara dhe lojtarë që nuk impenjohen maksimalisht në një ndeshje, janë ato që e shqetësojnë presidentin Takaj, prandaj pritet që numri një i Skënderbeut ndoshta të marrë masa karshi futbollistëve. /Panorama Sport/
