Vitjon Llukës nga fshati Shtëpëz i është vendosur eksploziv mesditën e sotme, teksa po nxirrte bagëtinë për të kullosur.
Këto janë dyshimet e grupit hetimor lidhur me ngjarjen e ndodhur mesditën e sotme në një fshat të Gjirokastrës, ku mbeti i plagosur rëndë 27-vjeçari.
Burimet nga grupi hetimor në vendngjarje, bëjnë të ditur se Vitjon Lluka ka konstatuar një objekt të çuditshëm të mbështjellë me letër dhe është ulur për ta hapur kur menjëherë ka shpërthyer, raporton Fax News.
Lluka ka ngelur pa ndjenja dhe dërguar me urgjencë në Spitalin e Gjirokastrës nga familjarët e tij. Ndërhyrja kirurgjikale ka qenë e menjëhershme aq sa mund të ndërhyhej pasi dëmtimi ishte shumë i madh.
Për rrjedhojë fytyra e Vitjon Llukës është deformuar në një masë shumë të madhe aq sa ka spostuar edhe pjesën e poshtme të nofullës. Duke parë se gjendja e tij ishte tejet kritike, në Gjirokastër ka mbërritur edhe helikopteri me të cilin e kanë transportuar për mjekim më të specializuar drejt Spitalit të Traumës në kryeqytet.
Mendohet se kjo ngjarje vjen si hakmarrje e një vrasjeje që ka ndodhur më 23 mars të 2016 në Kthesën e fshatit “Andon Poci” ku autor ka qenë Enrik Lluka vëllai i Vitjon Llukës të plagosur rëndë ditën e sotme.
Enrik Lluka në 23 mars 2016, ka qëlluar me armë zjarri ndaj kushëririt të dytë Dorian Llukës i cili humbi jetën dhe Bilbil Llukës që ngeli i lënduar si pasojë e dy plumbave. Enreik Lluka nuk është arrestuar ende nga policia.
Njoftimi policisë
“Më datë 25.02.2019, në vendin e quajtur “Hani” (kullotë) Subash, shtetasi V.LL, duke ruajtur gjedhët , dyshohet të jetë dëmtuar me lëndë plasëse, i cili është transportuar me helikopter drejt Spitalit të Traumës në Tiranë,”-raportoi policia.
Policia po punon për zbardhjen e rrethanave të ngjarjes.
